Bisbarra, 30 de agosto do 2023 – Un ano máis o concello de Negreira marca o fin do verán e o comezo do curso coa Feira do Románico que se celebrará esta vindeira fin de semana.
A Feira do Románico chega a súa decimo sexta edición e abrirase o vindeiro venres día 1. A inauguración formal será o sábado na casa do concello a partir das doce do mediodía.
Coma sempre Negreira tratará de que a vila volva ao pasado decorando as rúas e convidando aos veciños a participar. Con esa fina lidade desde hoxe mesmo poderán comezar a poñer a punto os traxes. O concello informa que existe a posibilidade de alugalos na Casa da Cultura hoxe día 30 , mañá 31 e o mesmo venres día 1. O horario de atención ao público será de 10:00 h. a 13:00 h. e de 17:00 h. a 20:00 h.
Aínda que polo momento non está pechado o programa definitivo está garantido que a Feira do Románico teña os habituais espectáculos de loitas entre cabaleiros, espectáculos de rúa, e un bo número de postos de artesanía e obradoiros de todo tipo.
A Feira do Románico de Negreira é unha das máis tradicionais da bisbarra. Tras uns anos nos que a imaxe decaeu, por diversas causas, o concello tomou medidas e as últimas edicións foron mellorando cada ano e levando á vila a milleiros de persoas na fin de semana. Este ano as eleccións e os conseguintes procesos administrativos retrasaron a súa posta en marcha polo que será un evento de transición- En calquera caso a diversión está garantida desde este mesmo venres.
