Bisbarra, 12 de novembro do 2024 – A delegada da Xunta, Belén do Campo, reuniuse, co alcalde de Negreira, Manuel Ángel Leis, para abordar as necesidades do municipio.
No encontro tratourse a renovación ou reforma do centro de saúde. A delegada confirmou que a Consellería de Sanidade está a analizar esta demanda, para o que os técnicos do departamento xa realizaron unha visita ás instalacións.
Outro dos temas do encontro foron as obras realizadas no CEIP o Coto de substitución da súa cuberta e renovación das fiestras nas que se investiron máis de 225.000 euros para mellorar a sostenibilidade e confort deste centro educativo. Manuel Ángel Leis lembrou a necesidade de mellorar a súa accesibilidade e o sistema eléctrico.
O rexedor tamén trasladou propostas en materia de saneamento e de infraestruturas. Unha das inicitivas é a mellora da seguridade vial coa construción dunha rotonda na AC-556 na contorna do polígono empresarial de Cobas, que optimizaría a mobilidade nesta zona.
Finalmente, o alcalde solicitou a colaboración da Xunta para poder empregar as instalacións da Unidade de Acción Formativa que a Consellería de Emprego, Comercio e Emigración ten neste municipio.
Neste ámbito, o alcalde trasladoulle o seu agradecemento polos obradoiros de emprego nos que que participa este municipio por ser de gran utilidade para a mellora da empregabilidade dos seus veciños.
Pola súa parte, Belén Campo recolleu todas a súas propostas e manifestou o compromiso da Xunta por manter e reforzar o apoio aos concellos galegos.
