Bisbarra, 18 de outubro do 2022 – O concello de Negreira, através do Centro do Información a muller, ven de poñer en marcha o primeiro Concurso de fotografía “Día da muller rural”.
O concurso conmemora a xornada do 15 de outubro, dedicada internacionalmente á muller rural. Como obxectivo principal a posta en valor do papel da muller, recoñecéndose a súa contribución na promoción do desenvolvemento agrícola e rural, mellora da seguridade alimentaria e a erradicación da pobreza no rural.
O concello de Negreira busca implicar ás persoas para que fagan chegar as súas instantáneas, nas que as mulleres deben ter un papel protagonista. Está dirixido a profesionais e afeccionados á fotografía, residentes en España, e poderán gañar un vale de 100 € para consumir no comercio local de Negreira.
O envío de imaxes ten de prazo ata o 25 de outubro. Só se admite unha fotografía popr autor e non poderá ser unha montaxe nin conter referencias que poidan evidenciar ao autor. As fotografías terán que enviarse nun arquivo dixital (formato JPG) dun mínimo de 5 megapíxeles.
As fotografías deben ser enviadas como arquivo axunto dun correo electrónico, ou ben por WeTransfer, ao seguinte enderezo electrónico: cimnegreira@yahoo.es . No asunto do correo electrónico deberase indicar o seguinte: I Concurso Fotográfico “Muller Rural” do Concello de Negreira e o nome da persoa participante.
Máis información e documentos precisos na web municipal de Negreira.
