Compostela, 30/03/2026 – The Rapants veñen de conseguir un fito do que é posible que non sexan conscientes. É certo que veremos se foi flor dun día ou ademais dunha forte industria musical tempos un público entregado e, sobre todo, amplo.
Un ecosistema incompleto
Compostela ten moitas salas de concertos. Desde os pequenos espazos dos pubs, pasando por salas un pouco máis grandes como a Riquela ou a xoia da coroa que supón a Capitol, a cidade entra a partir de aí nun deserto.
Se falamos de lugares de máis de 1000 persoas o que atopamos en Compostela son butacas. O Auditorio de Galicia é un templo da calidade sonora e o Palacio de Congresos, sen chegar a ese nivel, é unha alternativa que está cumprindo á perfección.
O problema xorde cando queres bailar, gritar, saltar, e divertirte como se merece un certo tipo de concertos. O salto desde a Capitol ata o Multiusos de Sar parecía demasiado grande e inaccesible. The Rapantas acaban de abrir un camiño no que ninguén cría.
Tempo de fe
Na rolda de prensa de presentación do concerto, nun multiusos baleiro, The Rapants recoñecían que moita xente dicíalles que non o fixeran, que era un risco. Esa dúbida razoable foi a que os levou a sacar ás entradas a venda pouco a pouco. Cando pasaron das cinco mil comezaron a estar superados polo éxito.
A cifra supuxo ademais máis investimento xa que a normativa a partir de cinco mil asistentes ten uns requirimentos maiores en cuestión de seguridade. O resultado demostrou que ademais de ser capaces de encher un lugar tan grande hai profesionais de nivel para xestionar o evento.
Agasallos e sorpresas
Unha pequena sesión sorpresa dunha formación de mariachis e a entrega do carné de socia/o de Rapants Club foron os primeiros agasallos que o público recibiu ao acceder ao recinto, no que os composteláns Ulex quentaron o ambiente coas súas guitarras.
Ás 21.05 da noite Mati, Samu, Xanma e Xaquín saltaban ao escenario para presentar o seu novo disco. Ao longo desta noite, Galician Army, Grande Amore, Sara Faro (Fillas de Cassandra), Antía Ameixeiras (Caamaño&Ameixeiras) e 9Louro acompañarán á banda nesta grande festa da música galega.
A alcaldesa de Santiago, Goretti Sanmartin, e a concelleira de Deportes e Festas, Pilar Lueiro, asistiron á celebración. O concello puxo ademais autobuses lanzadeira para facilitar a chegada ata o recinto.
O concerto foi un éxito pero foi sobre todo un exemplo de que hai máis público do que cremos. Esa terra de ninguén que parecía existir entre a Capitol e o Multiusos non existe. Pode que non toda a música galega sexa capaz de meter a máis de cinco mil persoas nun recinto pero os que recomendaba non intentalo xa teñen algo en que pensar. Noraboa a The Rapants polo concerto pero sobre todo por arriscarse e gañar, é posible que nuns anos recordemos que este concerto marcou un camiño.
