23/02/26 – Lindeiros falaba con The Rapants hai dous anos nunha conversa que podes escoitar aquí . Viñan de publicar “La maquina del buen rollo”, un disco e unha xira que pecharán o vindeiro sábado en Bruxelas.
Este concerto será un día antes de que se publique “The Rapants Club” e será no marco dun evento moi querido pola banda e que deu pé ao nacemento do seu tema Rue Franklin: o Festival Emigrason. Será un concerto moi especial, que pechará dous intensos anos de actuacións nas principais salas de concertos e festivais do país.
The Rapants Club, novo disco
A banda muradá publicará o seu cuarto LP, Rapants Club, o vindeiro 4 de marzo. Neste novo álbum, levan a súa música a outro nivel: variedade estilística, guitarras frenéticas, sintetizadores e retrousos pegadizos desde a primeira escoita conflúen nun traballo que dá boa conta da evolución do grupo, á vez que mantén, máis viva ca nunca, a esencia e identidade rapante.
“Rapants Club é moito máis que un disco: é a nosa maneira de entender a vida a través da música, de agradecer e compartir algo con toda a comunidade que formou e forma parte do noso progreso”, explican os rapantes, que acadaron esta semana os 100.000 ouvintes en plataformas como Spotify, na que o seu sinxelo Non Sei Como se situou como un dos temas máis virais en España.
Neste novo álbum, The Rapants presenta unha ducia de temas cunha sonoridade moi especial. A banda abre a porta a diferentes estilos musicais pero de fondo sempre está o baile e esa lembranza dos setenta, de Tony Manero e da música de baile.
The Rapants din que “Club” será un disco “bonito, elegante e atemporal” e que será “o máis fiel ao carácter e gustos” do cuarteto.
A grande inauguración deste “Rapants Club”, o concerto no que se poderán escoitar por vez primeira ao vivo os novos temas, terá lugar o sábado 28 de marzo no Multiusos Fontes do Sar de Santiago de Compostela, cita na que se esgotaron, en poucos días, as 4.500 entradas que se puxeron á venda.
