Galicia vive un dos seus mellores a nivel cultural, hai tanto tempo que o dicimos que se normalizaron cousas que non se producen tan a miúdo. Grupos como Sumrra, Dios Ke Te Crew, mesmo De Vacas se manteñen durante décadas mentres os seus membros van levantado proxectos a partir da experiencia acumulada.
Todo deriva nun ecosistema que crece cada día e no que agora aparecen Lumedoloop. Non é unha escisión, tampouco un fillo, pero forma parte inevitable do universo Dios Ke Te Crew. Mou, DJ Mil e Jamas levaban tempo preparando cousas pola súa conta e agora chegou o momento de sacalas á luz.
Traemos a Músicas na Linde cando DJ Mil remata de impartir unha clase na súa tenda da Rúa de San Pedro, hai canteira. Os tres valoran esa experiencia acumulada e engaden que os grupos “nodriza” se retroalimentan do que se fai fora deles.
En febreiro publicarase (Re)existencia pero ata entón van presentando algunhas cancións. A primeira, “Rico de sabor”, é toda unha declaración de principios e, coma sucede no que levan feito ata o momento, reivindica o que cada un é, o orgullo de ser un mesmo.
Como nacen as cancións é unha pregunta tópica pero o interesante sempre son as respostas. Jamas ten na cabeza moitas cousas e cada día ve outras novas, só precisaba dunha música que Mou se encargou de crear. Cada día ao camiñar cara o traballo as letras ían xurdindo.
Unha vez construídas hai que gravalas. Un proceso que Mou define como moi natural xa que se coñecen uns aos outros e saben exactamente como queren soar en cada caso.
Pero queda unha cuestión que sempre provoca curiosidade cando se trata dun novo grupo, de onde sae Lumedoloop?
(Re)existencia, o que será o seu primeiro disco, di moito de estes tres combatentes da música en particular e da vida en xeral. Retranca e resistencia son apelidos asociados aos seus nomes.
Un ADN que se mostra sen complexos en canto falas con eles cinco minutos. Capaces de rirse con toda a seriedade do mundo, mostrando que son, como xa dixera Dios Ke Te Crew, uns auténticos OG e se non sabedes o que é xa tardades en buscar a canción.
