Leslie e Los Sirex levan 65 anos enriba dos escenarios e estarán este domingo en Compostela no Outono Códax Festival, unha cita excepcional cunha banda única.
Esta semana temos dúas Músicas na Linde, e as dúas co Outono Códax Festival como escenario, pero o certo é que a posibilidade de entrevistas a Leslie, vocalista e fundador de Los Sirex, non se pode deixar pasar.
Os adxectivos quédanse escasos para falar de Los Sirex. 65 anos tocando, venerados polos rockeiros de pura cepa e nun dos mellores momentos da súa dilatada carreira. Cando Beatles e Rolling chegaron, eles xa estaban alí; cando Elvis comezaba a ser coñecido eles comezaban a tocar, pouco máis se pode dicir.
Los Sírex actuarán o domingo 9 na sala Capitol (apertura de portas ás 19.30 h) nun concerto dobre que contará tamén coa presenza da banda francesa Principles of Joy. As entradas (20 € + gastos de xestión) están á venda en A Reixa-Matrioska ou en salacapitol.com
E que lle pregunta un a alguén que leva 65 anos sobre un escenario? É difícil poñerse na súa pel pero ten que sentirse moi afortunado
Si dicimos que Los Sirex naceron co Rock and Roll non é unha esaxeración. En 1955 Bill Haley publicaba “Rock Around the Clock” e catro anos despois, en 1959 fundábanse Los Sirex. Non é que collera a ola é que creceron con ela, aínda que para Leslie todo foi froito de coincidencias.
Vinte anos despois, a finais dos setenta e nos primeiros oitenta o rockabilly soa nas emisoras de FM con grupos como os Stray Cats e en España Rebeldes ou Loquillo. Preguntamos a Leslie como viviu aquela etapa na que mozos recen chegados fan o que eles levaban 20 anos perfeccionando.
As cousas cambiaron moito e hoxe o que quere escoitar certo tipo de música ten que ir a buscala, non chega con poñer a radio. Leslie é moi consciente do momento actual; pensa, probablemente con razón, que hoxe os Beatles durarían tres días.
Poderiamos falar moito das cancións de Los Sirex pero só quixemos preguntar por unha en concreto. O tempo fainos ver as cousas con perspectiva, as veces magnificando as cousas e outras quitándolle importancia. “La escoba” foi un tema que, cos ollos de hoxe en día, era unha provocación en plena ditadura; o certo é que Leslie, autor da letra, só quixo contar a pobreza que vía ao seu redor e acabou sendo censurado nunha parte moi concreta da peza.
Con 65 anos de carreira e 81 de idade un esperaría un concerto máis tranquilo, vital pero contido, pero sen embargo, ao dicir dos que os viron e do propio Leslie, Los Sirex seguen dando botes sobre o escenario
Hai quince dias que Leslie estivo en Compostela pola súa conta e recoméndanos que coidemos da nosa cidade porque é un lugar único para desfrutalo e vivilo.
Ë un tópico demasiado usado pero encaixa á perfección: Leslie e Los Sirex envellecen como o bo viño. O certo é que levan tanto envellecendo que velos e escoitalos con esa actitude son ao tempo exemplo e provocación para os maiores máis conformistas.
Leslie podería ser o protagonista da novela ” O avó que saltou pola xanela e largouse ” do sueco Jonas Jonasson, alá polos 14 anos fuxiu coa súa banda e desde entón non deixou de camiñar. As veces non necesitamos “coaching” ou frases de Mr Wonderful, só precisamos Sirex.
