Galicia segue a vivir unha explosión de creatividade que leva a creación de novas bandas, a mesturas de proxectos e a unha actividade nunca ante coñecida por estas terras. Un contexto que se alimenta tamén da experiencia dunha boa cantidade de grupos que están celebrando nos últimos tempos aniversarios que superan os vinte anos de carreira.
Tona é o novo proxecto musical do ex Terbutalina Miguel Cernadas e con “Cruseiro” propón un disco “feito para bailar” con muiñeiras, xota e rumba; e que se poderá escoitar por vez primeira ao vivo este sábado, día 6, na Foliada da Fonsagrada.
Non vos equivoquedes, no disco de Tona atopamos trazas de country, rock, e mesmo arranxos orientais en temas como Maio, O Casal ou Carracho. A característica voz de Cernadas dálle ese punto de retranca que os temas tradicionais que escolleron levan implícita nas letras.
“‘Cruseiro” é un EP con cinco temas, editado por Tremendo Audiovisual, que xa se pode escoitar nas principais plataformas dixitais. Tona conta con Miguel Cernadas na voz e composición; Tomás Ageitos (Compañía do Ruído, Das Kapital) na batería e composición; Andrés Real (Oh Ayatollah) ao baixo; Roberto Comesaña no acordeón; e Gutier Álvarez no violinofón.
Todos eles acompáñanse de Víctor Álvarez como coautor, arranxista e técnico de son ao vivo. Este sábado, 6 de decembro, a partir das 12.00 horas, o público poderá descubrir en directo a música de Tona na 10ª Foliada da Fonsagrada.
Para a banda, “Cruseiro” ten “un pouco de todo”. “Ten harmonía, ten melodía e ten retranca”, di Cernadas. “É unha pota na que se funden melodías, ritmos e contos; é o cazo onde cociñamos Tona”, asevera Ageitos. Ao fío, Álvarez alude á “sonoridade singular” do proxecto, que combina melodías tradicionais con blues, pop e rock, e “que alenta os mediodías e seráns de baile”.
“Cruseiro” preséntase, segundo o seu cantante, como unha “apoloxía da aldea, da lingua, do noso carácter e da nosa tradición”. Os cinco temas que compoñen o EP (‘Carracho’, ‘O casal’, ‘Rhumba95’, ‘Maio’ e ‘Asubío’ ) dan boa conta dos ritmos e melodías tradicionais do país -como ‘A saia da Carolina’ que se descubre no tema ‘Maio’-, pezas que convidan a sacar puntos, raros ou non, para non deixar de bailar.
