Músicas na Linde 04/03/2026 – Sucede en artistas, producións, espectáculos, proxectos… co ser mesmo do que nace ou vive en Galicia, a melancolía forma parte do noso ADN e Antía Muíño non escapa a esta característica.
Quedamos para falar con ela un día chuvioso, un de tantos que levamos este ano. O doce do seu trato e a súa voz agocha unha muller forte, de ideas bastante claras e ilusionada co seu segundo traballo “Anfibia Por Veces”.
Comezamos sen poder tirar de retranca porque, co inverno que levamos, sacar un disco titulado “Anfibia Por Veces” pode ser acaído de máis. E máis alá da broma o nome e o tema define tamén a relación de Antía co seu entorno.
Antía recoñece como propia esa melancolía da que falabamos pero engade que ten algo de luminosa
Esa melancolía é unha fonte de creatividade. Do mesmo xeito o concepto de anfibia forma parte da forma de ser de Antía e está moi presente no disco.
Anfibia Por Veces está producido pola propia Antía e Hevi (produtor que vai desde Caamaño & Ameixeiras ata Novedades Carmiña ou FAIA). Ten un son natural que permite apreciar o traballo que hai detrás. Un traballo moi honesto xa que a maioría das pistas foron gravadas con toda a banda metida no estudio e non por patrtes.
No disco podemos atopar trazas de Guadi Galego, Uxía, Ses… algo que sae de xeito natural de Antía e que indica que hai unha transmisión entre xeración que con sorte garantirá a continuidade das contautoras en Galego
O concerto de Santiago será unha festa, iso é o que di Antía Muíño e non temos porque dubidar. Un espectáculo no que terá colaboracións especiais e que abre o ciclo Fiestra Aberta no que tamén estarán nomes como Ses, Rocío Márquez ou Su Garrido Pombo.
Marchamos baixo a chuvia pensando na naturalidade de Antía e na súa seguridade cando fala. Cremos que é unha artista que ten un longo camiño por diante no que descubrirá novas sonoridades, novos xeitos de cantar e, tal vez, máis de si mesma e do que a rodea; algo que forma parte da xéneses de calquera cantautora. Non deixedes de escoitar Anfibia Por Veces, de cando en vez está ben fuxir do que nos rodea e este disco axuda e moito.
Tedes toda a información do concerto e as entradas no seguinte enlace https://www.compostelacultura.gal/espectaculos/evento/anfibia-por-veces
