Trátase do primeiro volume dedicado ás Voandeiras, de Baldomero Iglesias “Mero”
O vindeiro martes 21 de outubro, ás sete da tarde preséntase no Museo do Pobo Galego un interesante traballo, o primeiro volume, sobre o Cantar de Cego en Galicia.
O acto contará coa intervención de Concha Losada, presidenta do Padroado do Museo do Pobo Galego e responsable do APOI; Valentín García, secretario xeral da Lingua; Diniz Cabreira, socio na Companha Editora; Xosé Quintás Canella, músico, cantante e prologuista do libro e mais Baldomero Iglesias, o autor. O peche do acto será unha actuación musical a cargo de Miro Casabella.
A publicación, que contou coa colaboración do Arquivo do Patrimonio Oral da Identidade (APOI) do Museo do Pobo Galego, afonda na figura do cantar de cego e destes persoaxes errantes, que percorreu camiños, feiras e romaxes levando un canto itinerante que facía vibrar auditorios improvisados.
Figura arquetípica, o cantar de Cego foi evocada polo tempo cunha visión amable e poética, representaba un modelo humano moi propio, convertido en referente estético e simbólico.
Este primeiro volume do catálogo, subtitulado Crónica e descrición de persoas, músicas e cantadelas, recolle ensaios e descrición sobre a figura das cegas e cegos cantores e unha proposta de catalogación dos xéneros rexistrados.
