Compostela, 4/05/2026 – O Museo do Pobo Galego presentou a programación do mes de maio. Unha serie de actividades que van desde a presentación de libros e documentais ata unha excursión, para socios, a Ferrol.
O punto de partida será o vindeiro día 12 xa que as sete da tarde presentarase o ensaio “Historias de muíños e muiñeiros/as na cerna de Galicia” escrito por Mª Montserrat Varela Vázquez
Trátase dun volume que aborda o patrimonio etnográfico dos muíños, tanto no seu aspecto material como, sobre todo, no inmaterial: costumes, tradicións, prácticas dos oficios, folclore e tamén o transcurso do tempo, os cambios sociais e as persoas que traballaban e acudían aos muíños en distintos concellos do interior de Galicia.
A obra afonda en todos estes temas a través das palabras de case corenta informantes e as súas historias de vida, complementadas con cantigas, poesías e contos arredor dos muíños. Editada coa colaboración do Museo do Pobo Galego, a obra recibiu unha mención especial no Premio Vicente Risco 2025.
O 30 de maio os socios do Museo do Pobo marchan a Ferrol. Un roteiro coa compañía do profesor Francisco Rodríguez no que se visitará, entre outros puntos de interese, o Museo da Construción Naval Fundación Exponav, o Castelo de San Felipe ou o Teatro Jofre.
Engadese ademais un itinerario baseado na biografía de Ricardo Carvalho Calero e subirase até o cumio do Monteventoso.
Exposicións
No capitulo das mostras hai que destacar a bibliográfica Letras Galegas 2026: Begoña Caamaño Rascado (1964-2014) que está aberta ata o 29 de xuño de 2026. No marco da programación do Museo do Pobo Galego polo Día das Letras Galegas, a Biblioteca organiza, como cada ano, unha mostra dedicada á persoa homenaxeada. Nesta edición, centrada na figura da escritora e xornalista Begoña Caamaño.
A autora viguesa é a décimo cuarta muller homenaxeada nesta celebración, sumándose a nomes como Rosalía de Castro, Francisca Herrera, María Mariño, María Victoria Moreno, Xela Arias, Luísa Villalta e as cantareiras Adolfina e Rosa Casás, Eva Castiñeira, Teresa García, Asunción Garrido, Prudencia Garrido e Manuela Lema. Nas súas novelas Circe ou o pracer do azul (2009) e Morgana en Esmelle (2012), destaca un revisionismo crítico do canon literario desde unha óptica feminista.
Continúan no Museo as estatuas do Mestre Mateo que se seguen podendo ver na ala sur do Museo ata o 26 de xullo.
O Museo Acolle
En esta sección da programación do Museo do Pobo presentarase o documental ”A costa e os castelos de Alejandro Gándara Porteiro. A cita o xoves, 28 de maio, ás 19 horas na Ala Sur.
Unha viaxe de verán pola Costa da Morte a través dos seus castelos, torres e pazos. O documental explora o pasado e o presente destes lugares para compoñer un relato que combina a investigación histórica cunha ollada curiosa, sensible e divertida cara a nosa relación co patrimonio.
A curtametraxe documental, premiada no III Certame Fondo de proxectos culturais Reino de Galicia da Deputación da Coruña, está producida e dirixida por Alejandro Gándara Porteiro, que tamén asinou obras audiovisuais como Dorothé na vila (2020) e 360 curvas (2025).
Novos fondos para o Museo
O fotógrafo holandés Ton van Vliet fará depósito do seu fondo ao Museo do Pobo Galego. Na Semana dos Museos, incorporarase este novo fondo á colección. O martes, 19 de maio, asinarase o contrato da cesión do material fotográfico de Ton van Vliet.
O fotógrafo holandés (Terborg, 1956) retratou coa súa cámara a Galicia que se recuperaba de corenta anos de ditadura, durante as súas visitas ao país entre 1978 e 1984. A través dunha ollada externa, captou a vida cotiá da comarca da Agolada, convertendo as súas imaxes nun punto de encontro entre culturas.
Ao incorporárense agora ao Museo do Pobo Galego, estas fotografías regresan como memoria compartida, tecendo relacións máis aló das nosas fronteiras e exemplificando o labor dos museos como espazo de conexión, unindo un mundo dividido, en liña co lema do Día Internacional dos Museos 2026.
