Compostela, 18 de xullo do 2023 – O Museo do Pobo Galego acollerá desde este mércores unha exposición da Fundación Vicente Ferrer sobre as vivendas da India rural.
A mostra “Habitabilidade e saneamento na India rural” inaugúrase mañá, no Claustro do Museo. A exposición é o resultado dun proxecto financiado pola Xunta de Galicia e a Fundación Vicente Ferrer para garantir o dereito a unha vivenda digna e saneamento básico a familias vulnerables do rural da India.
A mostra fotográfica combínase con textos informativos que ilustra o proxecto desenvolvido pola Fundación Vicente Ferrer, co financiamento da Xunta de Galicia, para promover o acceso á vivenda e ao saneamento básico a 57 mulleres e un home con discapacidade e ás súas familias da comunidade rural de Kothapalli (distrito de Anantapur).
O proxecto promove tamén a creación dunha contorna de vida saudable a través do impulso á conservación do medio ambiente, a xestión de residuos e a reciclaxe. A mostra, artellada desde unha concepción antropolóxica en liña cos obxectivos fundacionais do Museo, permite achegarse ás solucións adoptadas noutros lugares do mundo e comparalas cos modelos autóctonos e implantados en Galicia. Tamén, analizar as consecuencias que ten na vida das persoas e dos colectivos o feito de dispoñer dunha vivenda: a mellora da seguridade e a saúde comunitaria, a autoorganización da comunidade, a redución das desigualdades, os avances na consecución da igualdade de xénero e na eliminación da discriminación social a causa das discapacidades.
Tralo seu percorrido pola Escola Técnica Superior de Arquitectura (ETSA) da Coruña, o Palacio de Exposicións e Congresos (PALEXCO) da Coruña e o Centro Sociocultural do Concello de Negreira (A Coruña), a exposición poderá verse no Museo do Pobo Galego ata finais do mes de setembro.
A Fundación Vicente Ferrer
A Fundación Vicente Ferrer (FVF) é unha Organización Non Gubernamental de Desenvolvemento comprometida desde 1969 co proceso de transformación de zonas rurais en Andhra Pradesh e Telangana (sudeste da India). Apoia a comunidades empobrecidas e grupos especialmente vulnerables: mulleres e persoas con discapacidade. Aplica os seus programas en 3.819 aldeas e apoia máis de 3 millóns de persoas. O modelo de desenvolvemento da FVF na India coincide co conxunto de propostas globais da ONU para acadar os Obxectivos de Desenvolvemento Sostible en 2030.
