Unha intervención nos espazos do Museo, un faladoiro e unha conferencia conforman o listado de actividades previstas para homenaxear a Díaz Pardo, protagonista do décimo Día das Artes Galegas.
O Museo do Pobo Galego súmase ás homenaxes ao intelectual e artista Isaac Díaz Pardo, protagonista este ano do Día das Artes Galegas. O Museo desenvolverá un programa de actos propio en lembranza do que fora membro fundador e presidente do seu Padroado desde o ano 2000 até o 2011.
O vindeiros mércores 2, ás 19:00 horas, celebrarase no auditorio do Museo a conferencia Isaac Díaz Pardo. Memoria do compromiso, impartida polo investigador e escritor Xosé Ramón Fandiño, membro do Padroado do Museo do Pobo Galego.
Estreito colaborador do artista, Fandiño é editor de O Ollar clarividente de Isaac Díaz Pardo. Colaboracións xornalísticas (1963-2009) (Andavira Editora, 2018), unha recompilación de 514 artigos periodísticos escritos polo intelectual e publicados en diferentes diarios, fundamentalmente galegos; e autor de Isaac Díaz Pardo. Memoria do compromiso (Concello de Santiago, 2020).
A programación de actos inclúe tamén unha intervención nos espazos do Museo do Pobo Galego, cuxa apertura está prevista para o venres, 4 de abril, ás 12 horas. Espazos contra o baleiro fará un percorrido pola figura de Isaac Díaz Pardo e o seu papel na refundación do Seminario de Estudos Galegos, a súa particular vinculación co Museo do Pobo Galego e o seu labor a prol da memoria histórica.
Tres facetas do intelectual que quedarán reflectidas na intervención a través de documentación gráfica e bibliográfica, así como unha pequena escolma de pezas do autor, pertencentes todas elas aos fondos do Museo.
As actividades ao redor da figura de Díaz Pardo completaranse cun faladoiro o xoves, 24 de abril, ás 19:00 horas. Baixo o título Isaac Díaz Pardo creador do Laboratorio de Formas, contará coa participación de Xosé Luís Axeitos, María América Díaz, Fernando Arribas e Carmela Montero.
Isaac Díaz Pardo, insignia de ouro do Museo
Figura fundamental da cultura galega do século XX, Díaz Pardo recibiu a insignia de ouro do Museo do Pobo Galego en 2006 pola súa “significativa contribución ao coñecemento e prestixio da cultura galega no mundo”, e por ter sido “inspirador e impulsor de importantes proxectos”.
A Real Academia Galega de Belas Artes decidiu por unanimidade dedicarlle a décima edición do Día das Artes Galegas, pola súa condición como artista, “destacado representante da arte galega, ilustre pintor e ceramista”. Tamén, polo seu traballo na Cerámica de Sargadelos, que Díaz Pardo “concibiu como centro de investigación, tecnoloxía, deseño e difusión das artes e da cultura de Galicia”.
A RAGBA, da que o intelectual era académico de Honra, subliñaba tamén o seu labor na creación de Cerámicas do Castro, do Laboratorio de Formas de Galicia, de Edicións do Castro, do Museo de Arte Contemporánea Carlos Maside, do Seminario de Estudos Cerámicos de Sargadelos, do Laboratorio Xeolóxico de Laxe e do Instituto Galego de Información, entre outros proxectos.
