O Museo do Pobo Galego segue mes a mes crecendo en actividades e consolidando unha programación cada vez máis variada e interesante. Unhas características que non impiden as marcadas facetas educativa e patrimonial.
Cantareiras
Na recta final do ano das cantareiras e da poesía popular oral, o 17 de decembro o Museo do Pobo Galego presenta a publicación “Cantareiras. Oralidade. Creación. Transmisión”.
O libro, editado co apoio da Consellería de Cultura, Lingua e Xuventude a través da Secretaría Xeral da Lingua, recompila os contidos principais da exposición homónima que se puido visitar no Museo entre abril e setembro de 2025.
Trátase dunha obra concibida como homenaxe ás creadoras e transmisoras da nosa tradición oral, froito de meses de investigación a partir dos fondos do Arquivo do Patrimonio Oral da Identidade, da Biblioteca e Arquivo Documental, Arquivo Fotográfico e Colección do Museo.
A entrada será libre até completar a capacidade do Auditorio.
Exposicións
Espazos contra o baleiro – Até o 28 de decembro de 2025
Derradeiro mes para visitar a intervención expositiva en lembranza do intelectual e artista Isaac Díaz Pardo, membro fundador e presidente do Padroado desta institución desde o ano 2000 até o 2011 e homenaxeado do Día das Artes Galegas 2025.
A mostra propón un percorrido pola súa implicación na refundación do Seminario de Estudos Galegos, a súa fonda vinculación co Museo do Pobo Galego e o seu compromiso coa memoria histórica e cultural do país.
A exposición, impulsada polo Museo do Pobo Galego, conta cun equipo curatorial formado por Xosé Ramón Fandiño, María Xosé Fernández Cerviño e Pilar Sampedro.
Exposición do Proxecto Didáctico Antonio Fraguas Fraguas – Até o 4 de xaneiro de 2025
Durante todo o mes e até o 4 de xaneiro pode visitarse no Museo do Pobo Galego a mostra dos proxectos gañadores da XIII edición dos premios Antonio Fraguas Fraguas, que recoñecen o traballo dos centros educativos galegos na investigación e difusión do noso patrimonio cultural: Viva o Entroido vivo! Lingua, festa e comunidade, un proxecto colectivo do CEIP Lamas de Abade, o CEIP Apóstolo Santiago (Santiago de Compostela) e o CEIP Pérez Viondi (A Estrada); e A sustentabilidade das artes de pesca a través do proceso de encascado de redes: o caso de Burela, do IES Monte Castelo (Burela).
O Proxecto Didáctico Antonio Fraguas Fraguas, promovido desde 2004 pola fundación e patrocinado pola Xunta de Galicia a través da Secretaría Xeral da Lingua, impulsa a posta en valor do patrimonio etnográfico, antropolóxico, lingüístico, xeográfico, histórico e artístico desde as aulas.
O Museo Acolle
Presentación da restauración da película “Viaje por Galicia”, de Luis R. Alonso – 2 de decembro, 19:00 horas no Auditorio.
O Museo do Pobo Galego acolle a presentación da película restaurada “Viaje por Galicia”, dirixida por Luis R. Alonso, unha xoia documental que nos transporta á Galicia das primeiras décadas do século XX e, máis especificamente á provincia da Coruña da época.
A proxección do filme mudo será musicada polo cuarteto de corda Novecento, que será presentado polo director de orquestra e pianista Maximino Zumalave. O acto contará coa participación de Concepción Losada, presidenta do Padroado do Museo do Pobo Galego, Valentín González Formoso, presidente da Deputación da Coruña e José Luis Castro de Paz, catedrático de Comunicación Audiovisual e Publicidade da USC.
Presentación do libro “Un paseo ilustrado por Santiago de Compostela” – 9 de decembro, 19:00 horas no Auditorio.
O 9 de decembro presentarase no Museo do Pobo o libro “Un paseo ilustrado por Santiago de Compostela”. Unha publicación do Consorcio de Santiago con ilustracións de José Baqueiro Canabal e textos da historiadora Elena Iglesias Durán.
Trátase dun paseo ilustrado con 50 acuarelas de espazos emblemáticos da cidade. Unha ruta pictórica que conduce a unha peregrinación pola améndoa compostelá, fuxindo de perspectivas aéreas e situándonos ao pé dos edificios.
Outros
Horarios Nadal
– Os días 24 e 31 de decembro e o 6 de xaneiro abrimos como festivo: de 11:00 a 14:00 horas.
– Os días 25 de decembro, 1 e 5 de xaneiro pechado.
– O resto dos días horario habitual, de martes a sábado de 11:00 a 18:00 horas e domingos e festivos de 11:00 a 14:00 h.
