Vista cenital do acto celebrado no Museo do Pobo Galego polo 50 aniversario do seu Padroado
Compostela, 27/04/2026 – O 24 de abril de 1976 asinábase a acata fundacional do Padroado do Museo do Pobo Galego. O acto de conmemoración comezou coa lectura que de dita acta fixo o secretario do Padroado, Francisco Javier Sanjiao Otero.
Esa acta nacera co obxectivo de impulsar un museo para Galicia. Un ano despois, o 29 de outubro de 1977, abríase o Museo do Pobo Galego, consolidado hoxe como un espazo de referencia na investigación e divulgación do patrimonio material e inmaterial galego.
O Museo do Pobo lembrou este pasado venres esas datas cun acto institucional no seu Auditorio, no que se puxo en valor a traxectoria dunha entidade clave na preservación, estudo e difusión da cultura galega.
A conmemoración contou coa participación das e dos membros numerarios e institucionais do Padroado, así como dunha ampla representación de entidades e persoas vinculadas ao Museo.
Un dos momentos centrais do acto foi a intervención do patrón fundador Xosé Manuel González Reboredo, quen, baixo o título “Un lugar de memoria de Galicia”, reflexionou sobre o significado do Museo do Pobo ao longo destas cinco décadas e sobre o papel do Padroado na construción e continuidade deste proxecto colectivo.
A traxectoria da institución estivo tamén presente a través dunha peza audiovisual que ofreceu un percorrido pola historia e evolución do Padroado desde a súa creación. O acto contou coa participación do director xeral de Cultura da Xunta de Galicia, Anxo M. Lorenzo Suárez, e da alcaldesa de Santiago de Compostela, Goretti Sanmartín Rei, representantes de dúas das institucións que forman parte do Padroado do Museo do Pobo Galego.
Anxo M. Lorenzo dixo que era preciso recoñecerlle á institución o seu “compromiso coa divulgación e a popularización da cultura. Este Museo, durante sucesivas xeracións, deixou unha fonda pegada educativa e didáctica en todo tipo de públicos, dende escolares a familias e público xeral que atoparon sempre aquí un lugar onde recoñecerse, onde aprender, e onde dialogar co presente e co pasado de Galicia”,
Pola súa banda, a rexedora compostelá, Goretti Sanmartín, gabou o labor durante medio século deste Padroado e dun Museo que é un “fogar cultural e de identidade de todo o conxunto da poboación galega”.
Clausurou o acto a presidenta do Padroado, Concepción Losada Vázquez, quen destacou a vixencia da obriga fundacional da entidade: “Non se pode amar o que non se coñece; por iso, dar a coñecer o noso patrimonio é o primeiro paso para que poida ser valorado e transmitido”.
No seu discurso, Losada expresou tamén o seu agradecemento a todas as persoas que integraron o Padroado nestes cincuenta anos, salientando o seu compromiso continuado para facer posible e soster no tempo o proxecto do Museo.
Tamén puxo en valor a dedicación do persoal técnico, “un orgullo para este Museo e para este Padroado”. “Celebramos o camiño percorrido” —concluíu— “co orgullo de continuar esta tarefa sobre os ombreiros dos xigantes que nos precederon”.
A música acompañou a xornada coas interpretacións de Blanca Bello Sobral (viola) e Carlos García Amigo (violonchelo), que ofreceron un repertorio de distintas épocas: o Vox nostra resonet (Organum do Codex Calixtinus, s.XII); e o Affetuoso da Sonata Primeira de Les Delices de la Solitude, de Michel Corrette (1707-1795).
Así mesmo, as persoas asistentes ao acto tamén puideron desfrutar da voz de Faia Díaz Novo, que interpretou pezas da tradición oral procedentes do Arquivo Lomax e do Arquivo do Patrimonio Oral da Identidade do Museo.
