Bisbarra, 20 de maio do 2022 – O Bloque Nacionalista Galego leva ao Parlamento unha iniciativa para devolver a titularidade pública á Illa da Creba.
Os nacionalistas apoian a petición que impulsa a Plataforma pola Recuperación da Illa da Creba. Os responsables deron unha rolda de prensa en Esteiro para anunciar as iniciativas que levaron ao Parlmento de Galicia por medio da Deputada Rosana Pérez.
Un problema de cen anos
A Illa da Creba está situada na ría de Muros Noia, xusto fronte a Esteiro. Pese a que ata a década dos oitenta non se comezou a reclamar a titularidade pública, foi no 1922 cando uns particulares inscribiron a illa ao seu nome. Aproveitaron un baleiro legal xa que a illa non aparecía no inventario de bens do concello de Muros. Esta circunstancia foi descuberta polos veciños 60 anos máis tarde, cando comezaron a ver que se construía na illa, e comezaron a reclamar a devolución.
Cando no 2007 o Ministerio de Medio Ambiente fíxose con Sálvora, en Muros pediros o mesmo para a Creba.
A Creba no Parlamento
Dentro das iniciativas parlamentarias que anunciou a Deputada atópase unha proposición non de lei para Iniciar o procedemento correspondente para que a Illa da Creba volva á titularidade pública da Xunta de Galiza.
Elaborar de inmediato un informe de todas as obras, actuacións e actividades que se levaron, e se están a levar a cabo na Illa e se as mesmas contan con todos os permisos e autorización obrigatorias.
Realizar os estudos necesarios relativos aos valores medioambientais da Illa e dos fondos mariños que permitan valorar a súa cualificación como espazo protexido, segundo a lexislación vixente.
A iniciativa inclúe unha serie de preguntas que expliquen como é posible que exista un establecemento hostaleiro de luxo que anuncia a illa en portais estranxeiros como unha illa privada turística, sendo coñecedores das irregularidades que existen na inscrición da illa polos supostos propietarios no rexistro do concello de Outes, estando en territorio do concello de Muros, e habendo, ademais diferentes ordes xudiciais de paralización e derribo de obras que alí se fixeron.
Rosana Pérez insistiu en que o BNG apoiará, en tódalas instancias necesarias, incluso no Congreso dos Deputados, as xustas reivindicacións da veciñanza da ría de Muros e Noia, constituída en plataforma veciñal.
O representante da plataforma pola Recuperación da Illa da Creba, Rodrigo Romero (Bolato), dixo que o sentir do pobo de Esteiro principalmente, pero o de todo o concello e da ría, é o de mobilizarse ata conseguir que a illa volva a titularidade pública, porque sempre foi un baldío comunal, como así quedou explicado no libro recentemente publicado pola Fundación Galiza Sempre, autoría de Francisco Abeijón, A illa da Creba. Un baldío Comunal.
A concelleira Maruxa Martínez, do BNG de Muros, explicou que levarán ó Pleno as peticións da plataforma, para defender e reclamar a devolución da illa para o pobo.
