O Concello da Pobra do Caramiñal organizou, en colaboración coa Comunidade de Montes San Isidro de Postmarcos, unha visita guiada para descubrir á veciñanza parte dos resultados dos traballos realizados no Castro da Croa de Postmarcos.
As investigacións levadas a cabo deron os seus froitos segundo indicou a directora da escavación, Lupe Castro (da empresa Tempos Arqueólogos). Estes labores permitiron confirmar que o Castro da Croa estivo longamente ocupado e contou cunha extensa actividade. Segundo os traballos de escavación, tanto os galaicos como os romanos deixaron a súa pegada no xacemento.
Como apunta a directora da escavación, os achados apuntan a que a zona onde se executaron os traballos tería unha ocupación pertencente á Segunda Idade de Ferro. As seis sondaxes feitas pola empresa serviron para localizar abundante material cerámico de orixe romana.
Con todo, tal e como explicou a directora, ao non haber unha estrutura asociada a estes, non se pode determinar se houbo ou non ocupación do Castro da Croa por parte dos romanos. Así mesmo, descubríronse os restos dunha casa con forma circular e, a priori, de grandes dimensións.
Antiga muralla
Estes labores permitiron confirmar, ademais, a existencia dunha antiga muralla de pedra na zona da croa duns 2 metros de ancho, un achado que reafirma a importancia e a potencia deste Castro da Croa en termos defensivos.
O alcalde, José Carlos Vidal, que tomou parte na visita guiada, valorou os resultados da escavación “que nos permiten seguir afondando na historia deste xacemento, un dos máis importantes e singulares da comarca”. O rexedor agradeceu a colaboración da Xunta de Galicia e o interese e implicación dos veciños e veciñas que participaron na actividade.
A escavación contou cun investimento de 18.000 euros asumidos pola Dirección Xeral de Patrimonio Cultural da Xunta de Galicia.
