Compostela, 16 de novembro do 2022 – Miic na rúa levará a IV Mostra Internacional de Ilustración Contemporánea á rúa do Vilar cunha intervención en vivo.
O MiiC forma parte de IMAXINARIA, unha mostra de ilustración contemporánea que conta co apoio do concello de Santiago e que se pode visitar na actualidade na Sede Afundación.
MiiC na rúa consiste na realización dunha serie de intervencións artísticas simultáneas que se levarán a cabo na rúa do Vilar. Cada ilustrador ou ilustradora realizará a súa intervención de forma presencial, in situ, para que así os viandantes poidan ver de primeira man o seu proceso creativo.
As intervencións levaranse a cabo sobre as cristaleiras de emblemáticos escaparates da rúa como a Sombreirería Iglesias ou a Mercería Algui. Completan o percorrido a librería San Pablo e o escaparate de Asthor decoración.
Os artistas encargados de ilustrar ditos escaparates sonos galegos Berto Fojo, Natalia Umpiérrez, Perrilla e Twee Muizen, artistas que tamén expoñen en IMAXINARIA, IV Mostra Internacional de Ilustración Contemporánea.
Durante o proceso de creación situarase no lugar da intervención un roll-up informativo, e ao rematar a obra colocarase unha cartela cun código QR onde se poderá acceder á información da actividade e a mostra. Ademais, toda a actividade documentarase audiovisualmente a través da realización dun vídeo resumo do acontecido, e que favorecerá a súa difusión nas redes.
MiiC na Rúa persigue dinamizar o espazo público que rodea a mostra, concretamente as rúas que a circunda, buscando que estas se identifiquen como unha extensión natural da propia exposición, acercando a ilustración ao día a día do casco histórico de Santiago, funcionando como reclamo para visitar a propia exposición que se atopa localizada na mesma rúa, ao mesmo tempo que se pon o foco na importancia dos comercios locais como dinamizadores económicos e culturais.
As intervencións comezarán pola tarde do 19 de novembro, a partir das 16.30h e unha vez rematadas poderán verse, a lo menos, durante un mes, establecendo unha ruta ilustrada exclusiva na que arte e comercio local se fusionan para encher de creatividade o casco histórico da cidade.