Compostela, 24/06/2026 – Mercedes Rosón sempre foi leal ao PSdeG ata que o partido deixou de ser leal con ela. Cando no 2014 se presentou nas primarias para ser a candidata á alcaldía no 2015 contaba co apoio dos veciños e de moitos afiliados, pero o PSdeG sempre prefire complicar as cousas.
Con Paco Reyes o PSdeG, gañador das primarias con sospeitas nunca confirmadas de manipulación, perdeu cinco concelleiros, de 9 a 5, e Compostela Aberta obtivo o dobre, 10. Mercedes Rosón renunciou á acta e marchou para casa. No 2019 volveu para ser, outra vez, o número dous.
E no 2023 máis do mesmo. Si falabas con votantes e afiliados do PSdeG todos apostaban por ela como candidata e, sen unha queixa, volveu a sentarse detrás dun Bugallo que para a maioría estaba máis que amortizado.
Coa marcha do ex alcalde a un retiro dourado no Senado comezaron as presións. Un divorcio que acabou consumándose coa expulsión do partido de Marcedes Rosón, Gonzalo Muíños, Mila Castro e Marta Álvarez. Dez anos tardaron as forza invisibles do PSdeG local en conseguir apartala.
Mirar adiante
Todo isto o podería ter contado Mercedes Rosón na rolda de prensa que deron este martes, explicar aos xornalistas máis novos que o sucedido este mandato non é máis que epílogo dun mal guión. Unha vez máis Rosón foi elegante e dixo o xusto “somos máis de Santiago que de partido”.
Unha nova etapa
Os catro concelleiros insistiron en que non hai egos en este proxecto. Todos coinciden, de forma implícita, no liderado de Mercedes Rosón. Aspiraban a gobernar Santiago e, tal vez, poidamos ver cantos apoios socialistas ten o partido e cantos Mercedes. Gonzalo Muíños, a quen sempre lle custa conterse, o quixo deixar claro.
Será un proxecto propio, fora de partidos paraugas como Espazo Común. Todo indica que os papeis xa están presentados e só falta o visto bo do Ministerio del Interior. O seguinte será conformar unha lista con 27 persoas, tal vez unha das incógnitas máis interesantes de desvelar.
Coa candidatura de Mercedes Rosón a esquerda terá máis posibilidades de gobernar en Compostela. Compostela Aberta, con María Rozas, e BNG, con Goretti Sanmartín, poden ser compañeiras de viaxe, no caso dun resultados moi repartidos, xa que teñen máis cousas en común que diferencias. PSdeG e PP terán que facer un sobre esforzo porque Mercedes Rosón pode pescar nos dous caladoiros.
