Bisbarra, 24 de febreiro do 2023 – A proximidade non é precisa para colaborar como quere demostrar Melide que ven de unirse a outros cinco municipios para a xestión dixitalizada do ciclo da auga.
Pastoriza, Fisterra, Pol, Silleda e Valga serán os concellos que xunto con Melide concorran de xeito conxunto ás subvencións estatais para proxectos de mellora da eficiencia do ciclo urbano da auga.
No caso de Melide, a axuda permitirá a ligazón para depurar a rede de saneamento do polígono industrial da Madanela.
Estas subvencións son estatais e forman parte do Plan de Recuperación, Transformación e Resiliencia PERTE Dixitalización do Ciclo da Auga. Esta concorrencia conxunta permitirá aos seis concellos, no caso de contar coa subvención, a creación dun sistema de información e ferramentas dixitais co fin de mellorar a xestión do servizo.
O importe da subvención para o Concello de Melide será do 20,24%, o que representa algo máis de dous millóns de euros. A concesión desta subvención permitiría ao Concello de Melide un investimento na rede de saneamento do polígono industrial da Madanela para materializar a necesaria conexión e depuración das augas.
