Bisbarra, 22 de agosto do 2022 – Melide, Arzúa, Santiso, Toques e Vilasantar contarán con servizo de atención temperá, de xeito gratuíto, a partir do vindeiro mes de setembro.
O servizo de atención temperá contará con psicólogo/a, logopeda e terapista ocupacional. O obxectivo e atender as necesidades da poboación de 0 a 6 anos con trastornos no desenvolvemento ou risco de padecelos.
Os concellos implicados asinaron un convenio para optar de xeito conxunto ás subvencións autonómicas nesta materia. O seu horario de funcionamento será de luns a venres de 9h a 14h e de 16h a 18h. Todo o servizo será gratuíto, e prevese a súa entrada en funcionamento ao longo do mes de setembro.
Serán as e os pediatras os que deriven aqueles/as pacientes que requiran deste servizo ao mesmo. Con este fin, desenvolverán os diagnósticos correspondentes e, no caso de confirmar a sospeita sobre a existencia dun trastorno, derivarán o menor e á familia ao equipo correspondente.
A atención temperá engloba o conxunto de intervencións orientadas á poboación infantil de 0 a 6 anos, á familia e á contorna desta, co obxectivo de atender as necesidades derivadas de trastornos de desenvolvemento ou do risco destes. Estas intervencións procuran o desenvolvemento da autonomía e a consecución da súa inclusión social, tanto a través da atención das necesidades transitorias como das permanentes.
About the Author
