Bisbarra, 3 de novembro do 2023 – O departamento de cultura do concello de Melide ven de presentar unha ampla programación para o mes de novembro na que destacan o magosto e as xornadas micolóxicas.
A axenda de Melide inclúe tamén varias proxeccións cinematográficas ademais das actividades de conmemoración do 25N, Día Internacional pola Eliminación da Violencia contra a Muller. Unha programación que hoxe venres, na Sala de Conferencias do Edificio Multiusos, acolle dende as 20h, a segunda edición do Ciclo Cultural Literatura no Camiño coa autora Paula Carballeira que presentará o seu libro ‘As alumnas’, Premio Nacional de Literatura Dramática.
Tamén hoxe, as oito e media da tarde. proxectarase no Centro Sociocultural Mingos de Pita o filme de ficción ‘Código Emperador’, con Luís Tosar. Trátase dun absorbente thriller dirixido polo galego Jorge Coira.
Mañá sábado 4, e novamente o sábado 18 de novembro, terán lugar as Xornadas Micolóxicas, centradas nun dos grandes produtos do outono galego como son os cogomelos. As xornadas, que se celebrarán ambos días entre as 10h e as 14h, incluirán saídas ao monte para aprender a identificar e distinguir as especies comestibles e velenosas que se atopan na contorna municipal. A inscrición para a actividade pode facerse no departamento de Cultura do Concello.
O domingo 5 de novembro, terá lugar a celebración do Magosto no cantón de San Roque. Comezará con xogos tradicionais ás 17:30h. A partir das 19:30h, haberá degustación de castañas do país e chocolate. Ás 20h amenizará a xornada o grupo ‘Tanto nos ten’.
O xoves 9 de novembro proxectarase a cinta fantástica galega ‘O corpo aberto’, baseada no relato ‘Lobosandaus’ do libro ‘Arraianos’ do escritor Xosé Luís Méndez Ferrín, e dirixida por Ángeles Huerta. Será ás 20:30h no Centro Sociocultural Mingos de Pita. No mesmo lugar e hora, ao día seguinte, o venres 10, proxectarase a cinta de animación ‘Valentina’.
O xoves 16 proxectarase a peza documental ‘María Casares, a muller que viviu mil vidas’. Ao día seguinte, venres 17, será a quenda da película ‘Live is life’. Ambas as dúas sesións terán lugar no Centro Sociocultural, ás 20:30h.
Xa o xoves 23 proxectarase, no mesmo sitio e hora, o documental ‘Onde máis doe’, que recolle un arrepiante caso de violencia vicaria e maltrato. A última proxección do ciclo será o xoves 30 de novembro, cando se poderá ver o filme de animación Unicorn Wars, tamén ás 20:30h.
O mércores 29 de novembro, ás 19:30h e no Centro Sociocultural Mingos de Pita, a autora melidá Fe Núñez presentará o seu libro ‘En sístole’.
Actividades polo 25-N
Coincidindo coa celebración do Día Internacional pola Eliminación da Violencia contra a Muller, a Axenda Cultura inclúe varias actividades relacionadas con esta data. Deste xeito, terán lugar dúas charlas no Centro Social. A primeira será o martes 14 de novembro ás 17h co título ‘Saúde mental e muller’. A segunda, ‘Solo pelviano’, será o 28 de novembro á mesma hora. Ademais, o sábado 25 de novembro terá lugar a tradicional andaina e lectura do manifesto por esta data, ás 10h na praza do Concello.
Semana da Música da Terra de Melide
O mes de novembro tamén trae consigo unha nova edición da Semana da Música da terra de Melide. Será a trixésimo terceira edición. Todas as actividades se realizarán ás 19h no Centro Sociocultural Mingos de Pita, os días 11, 12, 18, 19, 24, 25 e 26 de novembro.
