Bisbarra, 17 de outubro do 2022 – O Concello de Melide ven de presentar o Outono Cultural, programa de actividades para os meses de outubro e novembro.
Entre o Día da Biblioteca e as Xornadas Micolóxicas, ata oito actividades integran o Outono Cultural. Alternativas de lecer para todos os gustos e todas as idades. O Magosto e o Samaín serán os grandes eventos relacionados coa cultura tradicional.
O Outono Cultural arrinca o día 24 coa celebración do Día da Biblioteca, na Biblioteca Municipal Xosé Vázquez Pintor. O Mago Paco representa ese día a súa función de maxia divertida “Contamaxias” ás 17.30h.
O xoves 27 presentarase a campaña de normalización lingüística “Melide agora e sempre en galego”, orientada a impulsar o uso do galego nos actos fúnebres, nas derradeiras vontades, nas placas mortuorias ou nas necrolóxicas que lembran os nosos seres queridos. A campaña será presentada no salón de Plenos da Casa do Concello ás 18.30h.
Ao día seguinte, o venres 28 de outubro, e dende as 20.30h, a sala de conferencias do Edificio Multiusos acollerá a conferencia “A vía láctea e outros motivos do Camiño de Santiago”.
Non será este o único evento relacionado coa temática xacobea. A entrada do Concello acolle dúas exposicións fotográficas con este fío condutor. Do 13 ao 20 de outubro exporase a mostra “100 lugares máxicos do Camiño de Santiago”. Do 25 ao 31 do mesmo mes estará exposta no mesmo lugar “No Camiño. As imaxes que viron os peregrinos”. O horario de visitas será durante toda a mañá e o mediodía, de 8h a 15h.
O domingo 30 de outubro, terá lugar no Centro Sociocultural Mingos de Pita a representación do espectáculo teatral para maiores de catro anos “Cubo”, a cargo da compañía Elefante Elegante. Será ás 18h.
O luns 31 de outubro, véspera de Defuntos, as rapazas e rapaces de Melide están convidados a pasar unha tarde arrepiante na “Tarde de Samaín” no centro sociocultural Mingos de Pita. A programación incluirá o espectáculo infantil “A Festa Malvada” de Teatro Calavera. Tamén haberá un espectáculo de luz negra, un obradoiro de tatoos fluorescentes e un photocall temático. As actividades darán comezo dende as 17h.
No mes de novembro, o Outono Cultural programa dúas actividades. A primeira delas será o Magosto, que terá lugar o sábado 5 dende as 17.30h. A esa hora darán comezo os xogos populares da Asociación Galega do Xogo Popular e Tradicional. Ás 19.30h terá lugar a degustación de castañas e chocolate, e as 20h actuará o grupo de música folk Fiandola.
O coñecemento e identificación das especies comestibles e velenosas de cogomelo centran a última actividade, as Xornadas Micolóxicas, que se celebrarán os sábados 5 e 12 de novembro. As xornadas incluirán saídas ao monte para aprender a distinguir no terreo as especies comestibles das que non o son. Haberá 40 prazas para esta actividade. As inscricións deben facerse no departamento de Cultura do Concello de Melide.
Mayka Basalo, concelleira de Cultura de Melide, sinala que un ano máis “o Outono Cultural ofrece á veciñanza actividades variadas e para todas as idades”. Neste sentido, a edil salienta que a programación recolle celebracións tradicionais, pero tamén aspectos como a ligazón de Melide coa ruta xacobea ou a gastronomía de tempada, así como espectáculos para as e os máis pequenos da casa.
