Bisbarra, 15 de febreiro do 2023 – O Concello de Melide vén de reclamarlle á Xunta unha serie de investimentos urxentes nos centros educativos do municipio.
No transcuros das últimas reunións mantidas entre a concelleira de Educación, María Jesús Iglesias, e as ANPAS dos centros educativos, así como nas inspeccións levadas a cabo, identificáronse e recolléronse varias necesidades urxentes que agora se reclaman da Xunta. Algúns investimentos demandados desde hai anos.
O Concello de Melide fai esta reclamación á Xunta ao amparo do Plan de Nova Arquitectura Pedagóxica que o Goberno galego presentou en 2021. Segundo este documento, onde a Xunta se comprometía a actuar no 40% dos centros escolares de Galicia antes de rematar o 2024, os CEIPs deben transformarse seguindo unhas directrices xerais de ampliación, rehabilitación integral, ou intervencións en fachadas e cubertas. Dentro do Plan recóllese tamén a creación de espazos de socialización como patios e pistas multideporte cubertas, de forma que poidan adaptarse ao uso durante distintos períodos do ano con normalidade.
Melide reclama para o Colexio Nº1 a reforma da zona deportiva exterior, que se atopa en mal estado e conta cun equipamento deportivo obsoleto. Do mesmo xeito, o desgaste da zona perimetral, que se emprega como espazo de recreo, fai necesario levar a cabo un asfaltado da mesma. A reforma dos baños é outra necesidades do colexio.
No tocante ao CEIP Martagona, o Concello a construción dun patio cuberto ou pista polideportiva de idénticas características, unha demanda realizada en varias ocasións ao longo dos últimos anos. Trátase do único colexio melidao que non dispón dun espazo cuberto para a práctica deportiva, o cal limita moito as actividades de ximnasia cando o tempo non acompaña. Por outra banda, e no mesmo centro de ensino, é notable o deterioro que presenta o valado do perímetro, comprometendo mesmo a súa estabilidade e representando, por tanto, un risco para a seguridade. O Concello pide igualmente que se acometa unha reparación nesta infraestrutura.
Por último, no CEIP Mestre Pastor Barral é necesario arranxar o tellado do centro. O equipo directivo advirte da existencia, dende fai anos, de filtracións. Por outra banda, é necesario pechar a pista polideportiva cuberta, de forma que o uso en tempada de inverno sexa máis cómodo.
Pola súa banda, o Concello de Melide levou a cabo nos últimos tempos máis de 150 intervencións de mantemento, dentro das súas competencias, coa inmediatez necesaria. A interlocución fluída cos equipos directivos e as ANPAs facilita a identificación das necesidades dos centros, permitindo un mantemento axeitado que axude a garantir que o ensino en educación primaria e infantil se dea nas mellores condicións para as nenas e nenos.
