Bisbarra, 10 de outubro do 2022 – Ao longo de este mes de outubro o concello de Melide afrontará a renovación da maquinaria escénica do Auditorio do Centro Sociocultural Mingos de Pita.
O investimento chegará aos 18.000 euros e porá solución ás carencias en equipamento escénico do auditorio, que ata o de agora non puido aproveitar todo o seu potencial.
As melloras permitirán converter o escenario nun espazo axeitado para actuar como importante contedor cultural. Incrementará ademais as posibilidades das actuacións que teñan lugar sen ter que recorrer ao alugueiro de equipamentos externos, reducindo deste xeito a achega económica que para o Concello supoñen as contratacións extraordinarias. O investimento redundará na comodidade das compañías e na calidade dos espectáculos.
A adquisición de nova maquinaria dotará o auditorio da estrutura necesaria para dar soporte a equipos de iluminación, son e tramoia. O equipamento escénico que se adquirirá comprende un sistema de colgado fixo co que dar soporte a aqueles elementos necesarios nas representacións que non forman parte da estrutura do auditorio.
O equipamento a mercar inclúe tres truss de aluminio triangular; dous polipastos eléctricos de cadea de 250 quilogramos; dúas varas electrificadas en tubo de aluminio cadrado de nove circuítos; dous adaptadores para elevar e suspender o truss; un mando de motor de armario fixo; un pantógrafo para fíos de cinta plana na vara de carga; unha liña de cinta plana de 18 circuítos de 25 metros; unha subministración e instalación de sinal de DMX no truss e un dimmer de seis canles.
O investimento para a adquisición de material será de 17.670,46 €. Desta cantidade, 6.926,82 € serán achegados pola Xunta de Galicia a través dunha subvención para equipamento de maquinaria escénica concedida pola Consellería de Cultura da Xunta de Galicia. O resto do investimento, aproximadamente dous terzos do total, será achegado polo Concello.
