Ribeira, 11/06/2026 – ADEGA denuncia que a praia do Róbalo, en Aguiño, concello de Ribeira, sufriu labores de explanación, movementos de area e eliminación de vexetación dunar na época na que está en plena cría a denominada píllara das dunas.
Os traballos tiveron lugar o sábado día 6, en vésperas do Día Mundial dos Océanos. ADEGA especifica que estas actividades desenvolvéronse sobre a propia praia e afectaron hábitats de interese europeo incluídos en diversos anexos e regulacións como por exemplo o referido ás “Dunas costeiras fixas con vexetación herbácea -dunas grises” consideradas prioritarias.
O espazo degradado inclúese, asemade, dentro da zona de presenza e da zona critica da píllara das dunas (Charadrius alexandrinus), ao abeiro do determinado polo plano de conservación deste taxón aprobado polo Decreto 9/2014. Esta especie de ave, considerada “vulnerable” no Catálogo Galego de Especies Ameazadas (Decreto 88/2007), áchase en plena época de reprodución.
Priorizar conservación ou turismo?
Cando aínda non se cumpriu un ano do traspaso efectivo de competencias da costa á Xunta de Galiza, esta nova agresión aos hábitats e especies protexidas pon a proba a xestión da Xunta do litoral durante a tempada de verán.
Só en 2025, a consellaría que dirixe Ánxeles Vázquez autorizou máis de 400 chiringuitos nas praias galegas, aos que lles permite, ademais, permaneceren abertos dende a semana santa até final de verán, con subvencións de 1 millón de € para facelos máis “biosostibles”. Semella, pois, bastante claro “cal é o obxectivo da Xunta: converter a costa galega nun decorado para o turismo masivo” explican responsables de ADEGA.
ADEGA agarda que a denuncia destas actuacións dea lugar a unha contundente actuación por parte da Xunta. Esixen de Medio Ambiente que inspeccione in situ o lugar para verificar o alcance e natureza das afeccións detectadas.
Debe comprobar tamén a legalidade das actuacións realizadas, e a existencia das autorizacións ou avaliacións ambientais que resultasen preceptivas habida conta dos valores naturais presentes neste espazo.
ADEGA solicita tamén que adopte as medidas cautelares precisas para evitar a continuidade ou agravamento dos danos e, no caso de apreciar infraccións da normativa, incoar o correspondente expediente sancionador e impoñer as medidas de restauración precisas.
