Ordes, 13 de xullo do 2017 – O Pleno da Mancomunidade de Ordes reuniuse esta semana coa orde do día prefixada para solicitarlle á Secretaría Xeral da Igualdade, pertencente á Consellería de Presidencia, Administracións Públicas e Xustiza, as axudas correspondentes para a promoción da igualdade no actual exercicio que servirían para manter o CIM.
Estas axudas suporían 100.950 € destinados ao mantemento do Centro de Información á Muller, CIM. O organismo é un dos máis valorados da Comunidade e avalado pola concesión de dous premios Coopera por parte da Xunta de Galicia.
A contía permitirá continuar coa actividade do CIM composto actualmente por catro profesionais (directora, psicóloga, avogada e axente de igualdade). A dita subvención está cofinanciada polo Fondo Social Europeo con cargo ao programa operativo correspondente ao período 2014-20.
Outras das axudas solicitadas alcanza os 1200 € destinados ao programa de prevención e tratamento integral da violencia de xénero. O proxecto consistiría na recuperación terapéutica en grupo dirixida ás vítimas e persoas recomendadas e desenvolvida por profesionais dentro da materia.
