Xabier Castro, alcalde de Dodro: “ Estou moi contento da aprobación da RPT, non tiñamos arquitecto, [] foise bordeando a lei con distintas argucias nos últimos anos de esta democracia cando deberíamos ter un arquitecto funcionario que permitira a toma de decisións en liberdade en materias urbanísticas”
O socialista Xabier Castro chegou á alcaldía de Dodro no 2019. Daquela conseguiu sacar adiante unha coalición co BNG e a Unidade Veciñal de Dodro. No 2023 esa coalición non se renovou polo que goberna cunha minoría de 3 concelleiros fronte a 8; pero pese a iso conseguiu sacar adiante temas de tanto calado como a nova Relación de Postos de Traballo, RPT, ou o contrato de Axuda no Fogar.
Os últimos orzamentos que conseguiu aprobar foron grazas a vinculalos a unha moción de confianza. Os plenos acostuman a ser tensos sobre todo pola actitude de Valentín Alfonsín Somoza, voceiro de Xente de Dodro (partido creado a partir de que o PP o retirara como candidato ás eleccións) que xa dixo en varias ocasións que nunca votaría a favor de nada e que aproveita as intervencións para acusar ao equipo de goberno de distintas cuestións sen presentar proba algunha.
Xabier Castro recoñece que a falta de ese acordo que permita unha maioría absoluta fai que estes dous anos foran difíciles e “laboriosos” xa que para sacar os temas adiante hai que negociar máis e chegar a acordos cos outros grupos. Con todo a valoración do alcalde é positiva e mesmo considera que chegar a acordos nun pleno con cinco partidos distintos ten o seu mérito.
Preguntámoslle a Xabier Castro polo ambiente nos plenos, esa constante crispación que se pode ver na canle de Youtube do concello onde están tódalas sesións. Si é complicado o debate entre cinco partidos, moito máis cando un deles non ten un interese real en propoñer ideas ou defender posturas cun mínimo de sentido común.
Mencionabamos ao principio que pese a esta minoría en estes dous anos sacáronse adiante, non sen dificultade, temas como a RPT ou o SAF, o servizo de axuda no fogar. O alcalde está orgulloso da relación de postos de traballo; unha ferramenta que organizará mellor o que ten que facer cada funcionario pero ademais incorpora a un arquitecto, algo imprescindible para o concello.
Na procura de novos habitantes o alcalde de Dodro conseguiu atraer emigrantes, que atoparan emprego e se asentarán no municipio pero, como pasa en toda a bisbarra, agora o problema xorde coa vivenda. Non hai vivenda de aluguer pese a que hai vivendas baleiras.
Quedan dous anos de mandato e o reto, unha vez aprobada a RPT, e conseguir pequenas modificacións no Plan Xeral de Ordenación Urbana. Cambios que axuden a organizar territorialmente o concello pero tamén que conviden a que pequenas industrias se asenten no municipio.
Xabier Castro é deses alcaldes aos que se lle nota que quere ao seu concello e o que fai. Traballador desde hai moitos anos no aeroporto Rosalía de Castro e xuíz internacional en concursos caninos, tería bastante que facer sen meterse en política pero fala de Dodro cun cariño que fai que un entenda que queira mellorar o concello e a vida da veciñanza. Que o consiga o no o terá que xulgar os cidadáns dentro de dous anos.
