Bisbarra, 18 de decembro do 2024 – A manifestación contra ALTRI, a defensa numantina en contra da Mina de Touro, a loita por recuperar a canteira da Casalonga ou as minas de Lousame… a veciñanza sabe onde esta o patrimonio a coidar, agora hai tamén que repoboar o futuro.
En esa liña de traballo de protexer o medio ambiente pero sementar para o futuro, aséntase o proxecto Comunidades Activas e Paisaxes Resilientes a Incendios Forestais e Cambio Climático (CAPRIF-CC). Eles organizan, en colaboración con Fundación Montescola, unha nova xornada para repoboar o monte de Froxán en Lousame.
Será o domingo 29 de decembro, entre as 10.00 e as 14.00 horas. Unha actividade gratuíta de voluntariado ambiental para repoboar con especies autóctonas unha contorna de cinco hectáreas de superficie.
As persoas interesadas en participar nesta actividade poderán inscribirse ata o xoves 26 de decembro enviando un correo electrónico cos seus datos de contacto (nome e apelidos, teléfono, correo electrónico e lugar de residencia) a info@montescola.org ou cubrindo o formulario existente na páxina web www.caprifcc.com.
O director da Fundación Montescola, Joám Evans, destaca que a repoboación levarase a cabo nunha zona alta do monte, na que se atopa o nacente do Regueiro do Ramo Curvo e na que xa se eliminaran especies pirófitas e invasoras como o eucalipto e a acacia.
Agora repoboarase con preto dun milleiro de exemplares dunha ducia de especies autóctonas, entre as que se atopan carballos, castiñeiros, pradairos, bidueiros, teixos, sabugueiros, salgueiros e érbedos.
O monte de Froxán foi recoñecido no ano 2017 polo Programa das Nacións Unidas para o Ambiente como unha das “Áreas Conservadas por Pobos Indíxenas e Comunidades Locais” (ICCA, nas súas siglas en inglés) e forma parte das zonas de actuación piloto do proxecto CAPRIF-CC para a restauración de hábitats, creación de cortalumes verdes, recuperación de espazos con valores culturais e eliminación de especies exóticas invasoras.
CAPRIF-CC está financiado pola Fundación Biodiversidad do Ministerio para la Transición Ecológica y el reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea – NextGenerationEU.
O proxecto CAPRIF-CC está impulsado pola Fundación Juana de Vega, a Fundación Centro de Estudos Eurorrexionais Galicia-Norte de Portugal (CEER), a Fundación Centro Tecnológico y Forestal de la Madera (CETEMAS), a Asociación Galega de Custodia do Territorio (AGCT) e a Fundación Montescola.
