A que fora candidata polo PSdeG-PSOE á alcaldía de Lousame, renuncia á acta de concelleira e a teórica substituta di que tampouco collerá a acta.
Mentres, literalmente, o PSdeG celebraba o seu V Congreso Provincial este domingo e elixía unha nova executiva, os problemas (como na vella serie de televisión) crecían. O concello de Lousame celebraba unha sesión extraordinaria na que tomaba coñecemento da renuncia de Ana María Domínguez Laíño, candidata do PSdeG-PSOE á Alcaldía, á súa acta como concelleira.
A renuncia fora formalizada o pasado 1 de maio. O alcalde en funcións de Lousame, Esteban Ares García, aproveitou para agradecerlle a concelleira “o traballo realizado ao longo deste meses e desexarlle a mellor das sortes na súa vida persoal e profesional”.
Esta baixa das filas socialistas non é a única xa que o pleno de Lousame tomou coñecemento tamén da renuncia anticipada de Ana Vanesa Martínez Figueroa a asumir a acta que deixa libre Domínguez Laíño, polo que o Concello enviará unha comunicación á Xunta Electoral Central para que traslade a petición á seguinte persoa na lista: Begoña Maroñas Maroñas.
A dous anos dunhas novas eleccións municipais a executiva do PSdeG ten bastantes cousas que resolver sen saír da provincia da Coruña. Outes, Lousame e Compostela por exemplo.
A situación en Santiago entrará nunha nova fase este venres nun pleno extraordinario no que, en principio, os expulsados pasarán a ser non adscritos e Sindo Guinarte e Marta Abal recuperarán o grupo municipal socialista.
Queda por ver si as sospeitas dos expulsados de que todo pasou para que Aitor Bouza entrara como concelleiro se compren. O feito de que Bouza saíra este domingo da executiva provincial pode indicar que se centrará na cidade pero tamén pode verse como un paso atrás na súa carreira política. Seguiremos atentos.
