Bisbarra, 15 de maio do 2023 – Lousame aprobou no último pleno da lexislatura o proxecto construtivo de mellora da rede de saneamento e da nova depuradora.
A nova depuradora de Lousame recibirá un investimento de case ao millón de euros. A aprobación inicial do proxecto contou cos votos a favor dos grupos municipais de PP e do BNG, e a abstención do PSOE. Agora será sometido a 20 días hábiles de exposición pública.
O proxecto construtivo da mellora da rede de saneamento e da nova depuradora de Lousame dará servizo aos núcleos de Devesa, A Silva, Berrimes, As Quintáns e A Costa. Unha actuación que permitirá tamén dar servizo a instalacións como a piscina e o polideportivo municipal, así como ao colexio Cernadas de Castro.
Así mesmo, o Pleno Municipal aprobou tamén un cambio nas achegas municipais a este proxecto: 0 euros en 2023, 105.262,18 euros en 2024 e 116.525,98 euros en 2025. Un cambio aprobado cos sete votos a favor do grupo municipal do Partido Popular e as catro abstencións de PSOE e BNG.
Outros temas
No resto da sesión, o pleno aprobou por unanimidade un recoñecemento extraxudicial de crédito de 66 euros para o pago dunha factura de 2022 presentada en marzo de 2023. Así mesmo, deuse o visto bo á adaptación da ordenanza fiscal por licencias de urbanismo e comunicacións previas á nova normativa (cos votos a favor de PP e BNG e a abstención do PSOE) e o establecemento dun prezo polas visitas ao complexo museístico de San Finx:
Tarifa xeral de 2 euros para persoas de 6 a 64 anos. Tarifa reducida de 1 euros para persoas empadroadas en Lousame e grupos escolares De balde para menores de 5 anos e maiores de 65. As tarifas foron aprobadas cos votos a favor de PP e PSOE e coa abstención o BNG.
