A loita contra a violencia de xénero segue sendo necesaria. Cando máis se loita parece que máis casos aparecen. Xa sexa pola razón que sexa o certo é que só queda seguir con máis forza.
A Mancomunidade de Ordes, a través do Centro de Información á Muller (CIM), realizou unha Xuntanza para o impulso das Mesas Locais de Coordinación Interinstitucional fronte á Violencia de Xénero.
A actividade constou de dúas sesións celebradas no centro Isabel Zendal de Ordes. No transcurso dos encontros realizouse unha revisión dos obxectivos acadados dende a posta en marcha da Mesa Local de Coordinación Interinstitucional fronte á violencia de xénero da Comarca de Ordes, constituída en abril de 2024.
Fíxose tamén unha actualización do plan de traballo nas anteriores sesión realizadas para a creación da MLC e identificáronse novas necesidades e dificultades detectadas polas persoas representantes dos distintos ámbitos (social, sanitario, educativo e xurídico) das Forzas e Corpos de Seguridade.
Do mesmo xeito, abordouse un modelo de acordo de actuación fronte á violencia de xénero que se considere posible e desexable implementar na comarca.
A acción foi organizada pola Dirección Xeral de Loita contra a Violencia de Xénero da Xunta de Galicia, no marco do acordo de colaboración asinado coa FEGAMP para a conformación dunha Rede de entidades locais contra a violencia de xénero.
A loita ten que partir do local, co apoio do resto de institucións e ámbitos. Só na proximidade poden detectarse os problemas, as eivas e as solucións. A Mancomunidade de Ordes da pasos que deberían ser copiados.
