Lindeiros, 2/06/2026 – A Fiscalía Superior de Galiza vén de comunicar a varios membros da Coordinadora Eólica Así Non que abriu dilixencias de investigación preprocesual polos cambios realizados nas Seccións do contencioso-administrativo do TSXG.
Sobre a mesa unha acusación de presunto delito de prevaricación. A Fiscalía tamén comunica que dá traslado das denuncias dos colectivos e da documentación á Fiscalía do Tribunal Supremo ao non poder investigar ás persoas denunciadas pola súa condición de aforadas ante a Sala Segunda do Supremo; correspóndelle ao Alto tribunal do Estado continuar coa tramitación das dilixencias de investigación.
Esta notificación da Fiscalía é froito a denuncia presentada hai unhas semanas por unha vintena de colectivos da Coordinadora Eólica Así Non. Estas asociacións requirían ao ministerio fiscal que investigase se a decisión da nova presidenta da Sala do Contencioso-Administrativo, Azucena Recio, de mudar os litixios eólicos da Sección Terceira á Segunda do Contencioso-Administrativo do TSXG, puidera ser constitutiva dun delito de prevaricación dos previstos no artigo 446 do Código Penal.
Estes cambios de competencias sobre proxectos eólicos e liñas de alta tensión fixéronse sen mudar as normas de reparto do alto tribunal galego. Este cambio, ademais, entra abertamente en contradición co rexeitamento previo por parte da Sección Terceira de inhibirse nas súas competencias a favor da Segunda ante as solicitudes formuladas pola Xunta de Galiza e por empresas do sector co-demandadas.
Para a Coordinadora Eólica Así Non, “as alteracións arbitrarias no reparto de asuntos -feitas en paralelo ao traslado de maxistrados e maxistradas da Sección Terceira da Sala do Contencioso – aplicáronse para satisfacer o interese expresado pola Xunta de Galiza e empresas do sector eólico nos procesos relativos ás autorizacións de liñas eléctricas”.
Estas decisións que afectan ao Contencioso-Administrativo motivaron tamén que os colectivos denunciantes presentaran tamén escritos de queixa diante das presidencias do Tribunal Superior de Xustiza de Galiza (TSXG) e do Consello Xeral do Poder Xudicial (CXPX) que aínda non recibiron resposta.
Os Colectivos da Coordinadora que presentaron es escrito de denuncia na Fiscalía foron os seguintes: ADEGA, CIG, SLG, FRUGA, ORGACCMM, ACOUGA, Amigas da Terra, Asociación Vento Libre, Asociación Fonte Seca, Asociación Tarabelada, A.C.I.B.A.L. (Amil Sen Eólicos e Colectivo do Vento), Plataforma Eólicos no Morrazo Non, Cerdido Di Non, Ortegal Di Non, Asociación de Veciños/as do Couzadoiro, Asociación Lobo, Nova Escola Galega, Amigos do Patrimonio de Castroverde, Asociación Veciñal Agra de Orzán.
