Cada fin de semana repasamos o máis lido en Lindeiros nos cinco primeiros días da semana. Aquí tes as novas que máis interesaron do 22 ao 26 de setembro.
As novas máis lidas esta semana en Lindeiros van de preocupacións lóxicas a interese pola festa e a cultura. No primeiro destaca entre outras a sentencia que condena á empresa municipal Augas de Ames e obriga ao concello a pagar 15.000 euros como indemnización por vulnerar os dereitos sindicais. Será recorrida segundo o concello así que é unha historia sen rematar.
Unha das romarías máis tradicionais, a estrela do mes de setembro, Santa Minia ten hoxe sábado o seu día grande e xa hai tempo que as procuras dos usuarios inclúen a programación. Hoxe a contorna da carballeira de Santa Minia, xa que a propia carballeira segue con coidados paliativos, encherase de xente e políticos. Momento para ver e deixarse ver e sobre todo comer e mesmo bailar.
Hoxe tamén o Museo do Pobo Galego clausura a exposición “Cantareiras”, mulleres ás que debemos a transmisión oral dun patrimonio que debemos coidar e ampliar. O punto e final o porá o espectáculo “586 cantos” a partir das oito da tarde.
Touro es as decisións do novo goberno son obxecto de escrutinio por parte dos lectores, Desde antes da toma de posesión están baixo o foco e segue sendo do máis lido. Como tamén e do máis lido, xa desde hai dúas semanas, o proxecto de planta de biogas en Trazo da que polo momento pouco máis se sabe.
