Ordes, 6 de maio do 2018 – Este luns, 7 de maio, ás 12 horas no IES Maruxa Mallo, terá lugar o lanzamento da nova cápsula Marumasat III mediante un globo de helio.
A misión da Marumasat leva por nome ‘Niño no faro’ e con ela preténdese obter imaxes estratosféricas a máis de 35.000 metros de altura do fenómeno do ocaso da lúa diúrna. Para isto incorporarase unha cámara go pro que irá captando constantemente imaxes no seu ascenso. Nesta ocasión, grazas a un dron, tamén se obterán imaxes aéreas externas tanto do globo como da cápsula. Entre as persoas que teñen confirmada a súa presenza neste día están o alcalde, José Luis Martínez Sanjurjo, e as concelleiras Susana García (Educación) e Ana Soneira (Deportes).
A Axencia Espacial Escolar Galega NOSA é a responsable de levar a cabo este novo experimento. Este pasado mércores, 2 de maio, xa tivo un primeiro ensaio no pavillón do instituto ordense. Nel participan tamén os IES Marco do Camballón e o de Miraflores, de Vila de Cruces e Oleiros respectivamente. Tamén foi convidado a participar o IES Xelmírez II de Santiago de Compostela, que poñerá a proba a operatividade das novas aplicacións para a obtención de datos científicos que servirán para a mellora das futuras viaxes. Para isto incorporará un teléfono móbil que irá recompilando a información.
Entre os numerosos experimentos científicos destaca o desafío biolóxico de facer que naza un animal na mesma estratosfera e regrese vivo á superficie terrestre. En colaboración co Museo do Mel de Arzúa intentarase eclosionar de forma sincronizada un ovo de abella obreira. Un reto que supuxo a preparación da propia cápsula para manter inalterables, entre outras variables, a temperatura do espazo.
Poesía Estratosférica
O novo deseño da cápsula confeccionada con material reflectante tratará de facela visible dende outros satélites. Esta incluirá, a maiores, os poemas vencedores do I Premio de Poesía Estratosférica, convocado recentemente para o alumnado dos centros participantes. Concretamente será un relato, o gañador, de cada un dos institutos.
