Unha das fotografías máis coñecidas de José Suarez, fotógrafo ao que se dedica o Luns do Ateneo
Compostela, 27/04/2026 – O Ateneo de Santiago celebrará hoxe, ás 19.30 horas, un novo Luns do Ateneo na rúa do Vilar, 19. A actividade servirá para conmemorar o Día das Artes Galegas cunha conferencia titulada «Vida e obra fotográfica de José Suárez».
A charla do Ateneo será impartida por Xosé Luís Suárez Canal, profesor da Facultade de Ciencias da Comunicación da USC. Porá o foco na figura de José Suárez, un dos nomes máis destacados da fotografía galega, abordando tanto a súa traxectoria vital como a relevancia da súa produción artística.
A sesión permitirá achegarse ao contexto no que desenvolveu o seu traballo e á importancia do seu legado dentro da historia da imaxe en Galicia, nunha proposta que combina divulgación e análise arredor da cultura visual galega.
O relator convidado esta semanano Ateneo, Xosé Luís Suárez Canal (Allariz, 1946), conta cunha ampla traxectoria no ámbito académico e cultural. Licenciado en Filosofía e Letras e en Filoloxía Francesa, foi catedrático de ensino secundario e é profesor asociado na USC.
Xunto a Manuel Sendón, impulsou o Centro de Estudos Fotográficos de Vigo e iniciativas como a Fotobienal de Vigo ou Vigovisións, ademais de comisariar numerosas exposicións e publicar monografías sobre fotógrafos históricos galegos. Como fotógrafo, participou en mostras colectivas en distintas cidades europeas e desenvolveu tamén unha destacada obra propia.
