A duodécima edición da Inchadiña, organizada pola Fundación Rosalía de Castro e a A.C. Dorna da Arousa, contará con 20 embarcacións de todo o país e sairá de Rianxo para homenaxear a Castelao ademais de a Rosalía.
Unhas vinte embarcacións tradicionais de todo o país uniranse novamente á “Inchadiña branca vela” nunha homenaxe das xentes do mar a Rosalía de Castro, que desta volta tamén homenaxeará a Castelao, de quen se cumpren este ano 75 anos do seu pasamento.
A Inchadiña subirá desde a Ría de Arousa (Rianxo) ata o Ulla e o Sar. Embarcacións chegadas de todo o país como gamelas, galeóns, bucetas, un carocho, un bote de Ribadeo e dornas de distinto tipo (polbeiras, de tope, xeiteiras), chamadas pola Fundación Rosalía de Castro e a A.C. Dorna da Arousa, coa colaboración do Concello de Padrón, de Rianxo, de Catoira, de Dodro, de Rianxo e de Valga.
A novidade desta edición é que boa parte das embarcacións sairán xa pola mañá do porto de Rianxo (ás 10 horas) para logo unírensese ao percorrido habitual, coa saída ás 16 horas desde a praia fluvial de Vilarello en Cordeiro (Valga) ata Padrón, onde se lle renderá unha homenaxe a Rosalía diante da súa estatua no Espolón de Padrón (aproximadamente ás 18.30 horas).
O día anterior, 25 de xullo ás 19 horas, haberá un acto de homenaxe a Castelao por parte dos mariñeiros participantes diante da súa estatua en Rianxo, con izado de velas das embarcacións e colocación dos remos en sinal de respecto.
Esta actividade, que se celebrou por primeira vez en 2013 para celebrar o 150 aniversario da publicación de ‘Cantares gallegos’, xurdiu como iniciativa das xentes da cultura marítima para honrar a unha autora que en ‘Cantares’ falaba das dornas que subiran Ulla arriba no seu tempo.
¡Que inchadiña branca vela
antre os millos corre soa,
misteriosa pura estrela!
Dille o vento en torno dela:
«Palomiña, ¡voa!, ¡voa!»
