Bisbarra, 23 de maio do 2022 – O novo roteiro Rosalía nos Camiños foi inaugurada por 150 persoas que desfrutaron do percorrido polos concellos de Rois, Dodro e Padrón.
A recadación da inscrición en este primeiro paso por Rosalía nos Camiños doarase a Asociación Amipa para colaborar coa integración das persoas con discapacidade intelectual da comarca do Sar.
Son 15 quilómetros desta senda amiga inspirada na obra ‘En las orillas del Sar’ que pasa por algúns dos lugares máis significativos na vida e obra da escritora. Na saída déronse cita o alcalde de Rois, Ramón Tojo; a concelleira de Deportes de Padrón, Lorena Couso; e os de Rois (Martín del Río) e Dodro (Abel Tarrío); o responsable de Cultura dodrense, Xoán Xosé Vicente, e o presidente da Fundación Rosalía de Castro, Anxo Angueira.
Tras saír do paseo do Espolón e deixar atrás a estatua de Rosalía, esta primeira andaina pasou ao carón do pazo de Hermida, onde viviu Rosalía varios anos e onde escribíu algunhas das súas obras. A fonte de Santa María, tamén en Dodro; o Santiaguiño do Monte e A Trabanca foron os seguintes puntos visitados.
Na zona de Fondóns, onde se inspiraba Rosalía e onde se colocou unha placa o ano pasado para poñer en marcha o proxecto desta ruta, as persoas participantes na andaina puideron gozar de excelentes paisaxes a carón do río Sar. Despois descubriron as pasarelas de madeira que colocaron os Concellos de Rois e Padrón para salvar diferentes regatos, antes de chegar ata a igrexa de Iria e o cemiterio de Adina, onde Rosalía estivo soterrada varios anos ata que os seus restos foron trasladados ao Panteón de Galegos Ilustres en Santiago.
O barrio da Matanza, onde está a Casa Museo de Rosalía de Castro, e a rúa Juan Rodríguez (onde se atopa a casa na que viviu a escritora de nena) foron os últimos puntos polos que pasaron os camiñantes antes de rematar esta senda amiga inspirada na obra ‘En las orillas del Sar’.
A ruta Rosalía nos camiños foi promovida polos concellos de Dodro, Padrón e Rois en colaboración coa Fundación Rosalía de Castro.
