Os problemas de fochancas son una denuncia habitual en todos os concellos. Hai tempo que na Estrada a situación da N-640 ven sendo motivo de queixas por parte dos condutores e, no concello, por parte do BNG.
Os nacionalistas da Estrada poñen o foco na “situación de abandono absoluto” que sofre a estrada nacional N-640 ao seu paso pola comarca e concellos veciños. Nunha acción de denuncia simbólica, militantes do BNG procederon á colocación de balizas luminosas, semellantes ás que obriga a DXT a utilizar nos vehículos, para sinalizar as numerosas fochancas, fendas e irregularidades que converten esta vía estatal nun perigo constante para a seguridade viaria.
Queixas polo asfaltado
As intervencións realizadas na N-640, realizadas polo Ministerio de Transporte como titular da estrada, son cualificadas polo BNG de “insulto á veciñanza”. Segundo a formación, os traballos de asfaltado foron unha auténtica “chambonada” xa que só taparon buratos se corrixir o firme en mal estado polo que as fochancas reaparecen ao pouco tempo.
Para o BNG “a N-640 é un desastre e o Goberno español mira para outro lado mentres os nosos veciños e veciñas xogan o tipo e os seus vehículos sofren avarías diarias”. Coa colocación das Balizas o BNG pretende sinalar directamente ao Executivo español como responsable da falta de mantemento dunha infraestrutura que é vital para a vertebración da Estrada.
