Compostela, 20/06/2026 – Xa está aberto o prazo de inscrición para participar nos obradoiros do II Encontro Internacional de Soundpainting Compostela, unha cita que reunirá na cidade artistas, creadoras e persoas interesadas na improvisación e na creación colectiva a través desta singular linguaxe de signos.
O encontro celebrarase entre os días 7 e 10 de xullo de 2026, impulsado pola Orquestra Galega de Liberación co apoio do Concello de Santiago, a USC, e a SGAE, e coa colaboración de Casa das Crechas, Borriquita de Belém e Camalea.
O soundpainting é unha linguaxe xestual creada polo compositor estadounidense Walter Thompson para dirixir composicións en directo nas que poden participar persoas procedentes de moi diversas disciplinas artísticas, como a música, a danza, o teatro, a poesía, as artes visuais ou a performance. A través de máis de 1.500 signos codificados, permite construír obras colectivas en tempo real, convertendo a improvisación nun proceso compartido de creación.
O programa formativo desenvolverase os días 8, 9 e 10 de xullo, en horario de 10.30 a 13.30 horas, na Sede da SGAE de Santiago de Compostela. Con carácter gratuíto, a proposta busca abrir unha porta de entrada ao soundpainting e diríxense tanto a persoas sen experiencia previa como a creadoras que desexen incorporar novas ferramentas aos seus procesos artísticos.
A organización oferta 25 prazas, que se irán adxudicando por rigorosa orde de inscrición no formulario habilitado pola organización. O prazo para anotarse permanecerá aberto ata o 1 de xullo ou ata completar a capacidade dispoñible.
Os obradoiros estarán impartidos por Eric Chapelle (Batik Soundpainting Orchestra, Francia), Johan Sabbe (Safety Last Ensemble, Bélxica), Angélique Cormier (YET Ensemble, Francia) e Xacobe Martínez Antelo (Orquestra Galega de Liberación, Galiza), referentes internacionais dunha disciplina que fomenta a creación colectiva e a improvisación en tempo real.
A organización chama a participar a instrumentistas, cantantes, intérpretes, performers, artistas visuais, escritoras e escritores e, en xeral, a calquera persoa interesada na creación colectiva e na experimentación artística.
O obxectivo é ofrecer un espazo de encontro, aprendizaxe e práctica arredor dunha metodoloxía que sitúa a escoita, a colaboración e a improvisación no centro do proceso creativo. Non se requiren coñecementos previos, só vontade de aprender, experimentar e gozar da creación colectiva nun espazo de traballo seguro.
Xunto á vertente formativa, o encontro contará cunha programación aberta ao público que permitirá coñecer o soundpainting en acción. Os días 7, 8 e 9 de xullo celebraranse concertos da Agora Guerrilla en distintos espazos da cidade: a Casa das Crechas, a Borriquita de Belém e o Café Camalea, todos eles ás 21.00 horas.
O programa culminará o 10 de xullo cun concerto da Orquestra Galega de Liberación na Casa das Máquinas na compaña das persoas participantes nos obradoiros, ás 19.00 horas.
A pasada edición reuniu en Santiago artistas procedentes de numerosos países e consolidou a cidade como un referente internacional para esta práctica artística multidisciplinar. O II Encontro busca ampliar a participación local e achegar o soundpainting a novos públicos.
