Unha protesta dos alumnos de bacharelato serviu para reivindicar a petición de que se lles permita abandonar o centro en recreos e horas libres.
Esta semana os alumnos do IES Antón Fraguas de Compostela, en Fontiñas, mobilizáronse contra unha medida que ven do curso pasado. En aquel momento prohibíuselle ao alumnado de bacharelato a saída do centro nos recreos e horas libres.
A medida é consecuencia da chegada dunha nova dirección ao centro e da norma da Xunta de Galicia que responsabiliza ás direccións do que lle suceda ao alumnado durante as horas lectivas, dentro e fora do recinto escolar.
Na práctica isto supón que as direccións dos centros decidan deixarlles sair ou non. Os alumnos lembran que ata fai dous cursos os que cursaban bacharelato tiña garantida a saída durante as horas libres e os recreos, e “para nós isto é un cambio negativo por diversas razóns. O IES Antón Fraguas, como a maioría, non está preparado para a magnitude de alumnado que, debido a esta nova normativa, queda dentro do centro (aproximadamente 250 alumnos de bacharelato e outros 500 da ESO)”.
O alumnado recoñece que “dende a dirección do centro ofreceuse a alternativa de quedar na clase durante os recreos, só aos alumnos de bacharelato. Pero na práctica non é unha solución realmente efectiva”.
Parte do profesorado está de acordo, para eles supón un cargo e un estrés engadido. Agora deben estar pendentes, non só das gardas no patio, senón que tamén no piso de arriba (o de bacharelato) polo que entenden que para eles tamén supón un desgaste.
E os alumnos de bacharelato “afrontamos dous cursos moi complicados nos que necesitamos un espazo no que desfrutar do noso tempo de lecer que nos permita realmente descansar no medio da xornada lectiva. Quedando na clase, o noso espazo de traballo no que xa estamos as seis horas restantes da mañá, non conseguimos ter esa sensación de descanso real”.
Os alumnos din ser “conscientes de que cambiar esta normativa non está en mans do centro. Por iso o alumnado de bacharelato do IES Antonio Fraguas animado polo IES Rosalía de Castro que xa se mobilizaron buscando flexibilidade ante esta situación, pedimos un cambio que nos permita desfrutar correctamente dos nosos tempos de descanso e desconexión”.
