Compostela, 02/09/2026 – Comeza setembro e o Museo do Pobo Galego presenta a súa programación. Rafael Baltar será un dos protagonistas cunha exposición e unha xornada de amizade arredor da súa figura.
Esta xornada de amizade terá lugar o vindeiro martes 8 de setembro, a partir das catro e cuarto da tarde no Auditorio do museo. Trátase dunha xornada aberta ao público, na que profesionais de diversos ámbitos dialogarán sobre a obra e legado de Baltar.
O diálogo e a conversa arredor da figura do arquitecto, profesor e presidente da Xunta Xestora e membro do Padroado do Museo do Pobo Galego será o eixe da xornada. Está organizada polo Colexio Oficial de Arquitectos de Galicia e a súa Delegación de Santiago (Arquitectos de Santiago), o Museo do Pobo Galego e a Escola Técnica Superior de Arquitectura da Coruña.
Frazadas con flores de Chiloé
Dous días despois, o 10 de setembro, terá lugar a conferencia Frazadas con flores de Chiloé, de Trinidad Flaño Mandujano, ás 19:00 horas. Na ala sur do Museo do Pobo Galego, sala de actividades, impartida pola investigadora e directora do Comité Nacional de Conservación Téxtil de Chile Trinidad Flaño Mandujano.
A experta rastrexou as orixes dos diversos deseños e técnicas das frazadas de flores características do Arquipélago de Chiloé. Froito da súa investigación é esta conferencia, que traza ademais unha conexión entre estes obxectos téxtiles e os cobertores ou colchas de Galicia, como as que forman parte dos fondos da Colección do Museo do Pobo Galego.
Exposición Rafael Baltar. Testemuña dun tempo
Unha visita guiada á exposición sobre Rafael Baltar é unha boa razón para facerse soci@do Museo do Pobo. Terá lugar o 12 de setembro ás 11:30 horas, no Claustro alto. A visita será da man de Paula Franjo Calvo e Sandra González Álvarez, comisarias da mostra.
A actividade é de balde ata completar capacidade. Para anotarse, é preciso enviar un correo a socios@museodopobo.gal. O prazo de inscrición remata o xoves, 10 de setembro, ás 17:00 horas.
A pegada do SIAC
23 de setembro ás 17:00 horas no Auditorio do Museo do Pobo Galego, Como acto final da exposición sobre Rafael Baltar, o Colexio Oficial de Arquitectos de Galicia convoca A Pegada do SIAC, unha xornada de lembranza do cincuenta aniversario do I Seminario Internacional de Arquitectura en Compostela, que reuníu en 1976 a unha xeración de arquitectos que viña discutir como intervir nos centros históricos e que forma debía tomar a cidade que se estaba a construír.
Participarán impulsores e asistentes ao curso, xunto a unha serie de reflexións actualizadas sobre as preocupacións da arquitectura contemporánea, nun percorrido que vai do contexto galego dos anos setenta ao que Santiago aínda ten pendente de pensar.
O Museo Acolle
Este mes na actividade denominada o Museo Acolle chega o Festival Plataforma 2026, coa actividade “Medro, medro e non sei onde parar” de Ismael Ramos. Terá lugar este mesmo venres ás 17:00 horas.¡, no Claustro do Museo do Pobo Galego.
Ismael Ramos presenta en Plataforma 2026 unha acción de poesía performativa que reivindica a palabra como espazo de encontro, resistencia e acción colectiva. A través de panfletos poéticos, intervención gráfica e un recital performativo arredor do verso de María Mariño, a proposta recupera a forza da poesía como ferramenta de mobilización e resistencia. Esta acción forma parte do festival Plataforma de artes performativas.
Libros
Tamé este mes presentase o libro “O cineasta Carlos Velo e o Consello de Galiza en México”, de Xosé Enrique Acuña Rodríguez. Será o 22 de setembro ás 19:00 horas na Ala Sur do Museo do Pobo Galego, Sala de actividades.
A obra, editada pola Fundación Carlos Velo, afonda nun aspecto persoal moi descoñecido do cineasta: os seus pasos no exilio mexicano, centrado no seu papel á fronte da Delegación do Consello de Galiza en México, unha institución creada polos deputados galegos exiliados que naceu para manter acendido o facho da autonomía de Galicia plebiscitada con éxito en 1936. A presentación contará coa presenza do autor, Xosé Enrique Acuña Rodríguez.
