Compostela, 19/07/2026 – WOS Festival x SON Estrella Galicia ven de presentar as primeiras confirmacións no que será a súa novena edición. Este primeiro avance reúne dezaseis proxectos que volven situar as estreas, os novos formatos audiovisuais e algunhas das propostas máis estimulantes ela música electrónico e experimental contemporánea.
A programación do WOS inclúe sete concertos audiovisuais, entre os que destacan cinco estreas en España: mātr, o novo proxecto audiovisual de Paul Jebanasam; Friction, de Slikback feat. maltdisney & Tasya; e os novos espectáculos audiovisuais de Space Afrika, Visible Cloaks e Yu Su.
A eles súmase a estrea mundial do novo concerto audiovisual de Blood of Aza. Jokkoo Collective completa este bloque coa presentación de Organic Intelligence. Este primeiro avance incorpora ademais a presentación por primeira vez en España dos novos álbums de Ana Roxanne, Juli Deák e Shackleton. Completan a selección de directos Polygonia e Eerie Enterprise, o proxecto conxunto de Piezo e upsammy.
A programación complétase cos DJ sets de Lee Gamble, Mor Elian, JASSS e gyrofield, catro nomes que representan distintas sensibilidades dentro da escena electrónica internacional contemporánea.
Durante tres días, igrexas, teatros, edificios patrimoniais e outros espazos singulares do casco histórico de Santiago volverán converterse en escenarios para unha programación concibida especificamente para cada lugar.
Un ano máis, WOS propón un percorrido no que a música dialoga coa arquitectura, o patrimonio e a creación contemporánea, convertendo a cidade nunha parte esencial da experiencia do festival.
Os Weekend Pass xa están dispoñibles a través da páxina web oficial do festival e das plataformas Ingresse e Ataquilla. Inclúen acceso a toda a programación, ademais de acceso prioritario aos espazos con capacidade limitada ata quince minutos antes do inicio de cada actuación. As entradas de día e o resto de modalidades anunciaranse proximamente.
Sobre WOS Festival x SON Estrella Galicia
WOS Festival x SON Estrella Galicia é un festival internacional de cultura contemporánea que se celebra anualmente en Santiago de Compostela. Durante tres xornadas reúne música, artes visuais, cinema, artes escénicas e experiencias
inmersivas nunha programación concibida desde o diálogo entre disciplinas, artistas e espazos.
Desde a súa creación, o evento consolidouse como unha referencia dentro da creación contemporánea polo rigor da súa proposta curatorial e pola súa capacidade para xerar encontros entre artistas, profesionais e públicos de diferentes contextos e procedencias. Ao longo da súa traxectoria foi recoñecido como Mellor Festival Indoor de Europa nos European Festival Awards e como Mellor Festival Indoor Nacional nos Iberian Festival Awards.
O festival conta co patrocinio principal de SON Estrella Galicia e co apoio da Xunta de Galicia, a través da Axencia Turismo de Galicia no marco de Concertos do Xacobeo, así como da Deputación da Coruña e do Concello de Santiago de Compostela.
