Melide, 28/07/2026 – O Concello de Melide presentou o cartel e a programación do Mercado Medieval. Medio cento de propostas e actividades na rúa compoñen unha cita que volverá transformar o corazón de Melide nun espazo de ambientación medieval durante a segunda fin de semana de agosto.
Durante tres días, veciñanza e visitantes poderán desfrutar dun mercado de artesanía e gastronomía, música, animación de rúa, espectáculos e actividades para todos os públicos. As rúas do centro histórico acollerán durante toda a fin de semana pasarrúas musicais, representacións teatrais, personaxes medievais, danzas e animación itinerante da man de Gaeloc, Bufón Vermello, Nazareth e La Trupete de Luisete ademais dun recuncho infantil con xogos tradicionais, atraccións e unha exposición de antigos oficios.
Como xa é habitual, o Mercado Medieval coincidirá coa celebración do Mercamelide na Rúa, reforzando a dinamización comercial e ofrecendo unha fin de semana na que historia, tradición, gastronomía e comercio compartirán protagonismo.
Programación
O Mercado Medieval abrirá as súas portas o venres 7 de agosto ás 19:00 horas co inicio da actividade no mercado e a chegada dos primeiros personaxes medievais. Ao longo da tarde sucederanse a música e a animación itinerante a cargo de Gaeloc, as intervencións de Bufón Vermello, as danzas medievais e o espectáculo ‘Nazareth, a meniña do lume’. A xornada culminará con ‘Cazadores de Dragóns’, un espectáculo nocturno de lume e malabares.
O sábado 8 de agosto, o mercado abrirá ás 11:00 horas xunto co espazo infantil. Durante a mañá haberá pasarrúas, actuacións de rúa e outros espectáculos que ambientan a xornada antes da hora do xantar, prevista para as 14:30 horas nas tabernas e cantinas. Pola tarde, o mercado reabrirá ás 19:00 horas e o espazo infantil ás 19:30. A programación continuará con gaitas, fanfarras, tambores, teatro, música e animación, e terá como momento destacado da noite o espectáculo ‘Cazadores de dragóns’, con Bufón Vermello, Nazareth e Gaeloc.
O domingo 9 de agosto, o mercado e o espazo infantil abrirán ás 11:00 horas. A mañá contará de novo con música, teatro de rúa, danza e animación, antes da hora do xantar. Pola tarde, o mercado e o recuncho infantil reabrirán ás 18:30 horas e a programación continuará con música e máis animación. O Mercado Medieval despedirase ás 21:45 horas cun pasarrúas final no que participarán todas as compañías.
Durante todo o mercado medieval permanecerán abertos o espazo infantil con xogos tradicionais, atraccións para os máis pequenos, e a exposición de antigos oficios.
O concelleiro de Comercio, Xosé Igrexas, destacou a importancia do Mercado Medieval e subliñou que a súa coincidencia co Mercamelide na Rúa permitirá ofrecer unha fin de semana de lecer, cultura e promoción do comercio local. “Desde o Concello seguimos apostando por iniciativas que contribúan a dinamizar Melide, atraer visitantes e apoiar o tecido comercial, ofrecendo ao mesmo tempo unha programación atractiva para persoas de todas as idades”, sinalou.
O Concello de Melide anima á veciñanza e ás persoas visitantes a achegarse á vila durante esa fin de semana para gozar dunha programación pensada para todos os públicos e descubrir o ambiente medieval, a gastronomía, a artesanía e o comercio local.
