Imaxe cedida Radio Taxi Compostela
Compostela, 28/07/2026 – Santiago de Compostela ven de aprobar a convocatoria do concurso para a adxudicación de 29 novas licenzas de taxi. Todas as licencias son para vehículos adaptados para persoas con mobilidade reducida, se ben non serán de uso exclusivo para estes usuarios e usuarias.
O prazo para a presentación das solicitudes rematará o 18 de setembro. O concelleiro de Mobilidade, Convivencia e Centros Socioculturais, Xan Duro, lembrou que “esta será a primeira ampliación do número de licenzas de taxi en Santiago desde 1998”.
O edil mostrouse convencido de que “este procedemento, sumado á adxudicación do contrato dos autobuses, marca o inicio do novo tempo para a mobilidade en Compostela”
O concelleiro recordou que na actualidade cómprese a ratio legal de un taxi por cada mil habitantes, “pero acreditamos diante da Xunta de Galicia, administración que debe autorizar as novas licenzas, que a oferta non se axusta á demanda real de Compostela porque por cada 100 persoas residentes, hai outras 77 con vínculos na cidade por razóns de estudos, traballo ou outras causas”.
O concepto de persoa vinculada entende que se trata de alguén que pasa un mínimo de 14 noites por mes en Compostela. Un dato que implica que a cidade da servizo a moitas máis persoas que as que están no padrón; desde turistas a estudantes ou traballadores temporais.
Para Xan Duro “non era lóxico ter os mesmos taxis operativos que hai dez anos, cando neste tempo gañamos 4.000 habitantes, máis de 200.000 peregrinos e peregrinas, e 1,5 millóns de pasaxeiros e pasaxeiras no aeroporto Rosalía de Castro”.
O concelleiro de Mobilidade sinalou que finalmente as 29 novas licenzas serán para vehículos adaptados para persoas con mobilidade reducida, “atendendo a unha solicitude do propio sector do taxi e á demanda de diferentes entidades sociais”.
Duro apuntou que, aínda que se cumpría a ratio legal que obriga a contar cun 5% de taxis adaptados, “as necesidades parecen ser maiores e estímase que a demanda actual tenderá a aumentar por mor do envellecemento da poboación”.
O edil defendeu que “todos os veciños e veciñas teñen dereito a acceder ao transporte público en igualdade de condicións, e cando a oferta de vehículos adaptados é mínima, ese dereito non está salvagardado”.
Fíxase un canon de 88.000 euros, tendo en conta que o mercado está traspasando licencias por riba dos 140.000 euros, e establécense criterios de valoración que “pretenden favorecer que as persoas que veñen traballando como condutores e condutoras asalariadas do taxi accedan á súa propia licenza”.
