Compostela, 12/09/2026 – Tras unha primeira edición con moi boa acollida a sede da Afundación en Compostela acollerá novamente Artesanamente. Do 18 ao 20 de este mesmo mes póñense en valor a artesanía, os oficios tradicionais e os produtos de proximidade.
Participarán máis de 40 marcas e contará cunha ampla programación paralela. Artesanamente foi presentada no concello de Santiago pola concelleira de Dereitos e Servizos Sociais, Promoción Económica e Xuventude, María Rozas, coa participación de o director xeral de Comercio e Consumo, Gabriel Alén; a directora de promoción de Turismo de Galicia, Carmen Pita; o xefe da Área de Calidade Alimentaria de AGACAL, Ricardo Rivas; e Manuel Moledo, de Aquelando.
A tenenta de alcaldesa explicou que o obxectivo desta iniciativa é “darlle visibilidade ao talento e a riqueza cultural que se agochan detrás das marcas de artesanía local de Galicia, mostrar os seus produtos únicos que reflicten a nosa identidade, e poñer en valor os oficios tradicionais, mostrando as súas técnicas e procesos de creación”.
Programa
No mercado Artesanamente participarán máis de 40 marcas de artesanía de diferentes disciplinas, incluída a artesanía alimentaria. Nos seus postos poderanse coñecer e adquirir produtos únicos, como xoias, moda, vaixelas, cerámica ou produtos de coiro. No que ten que ver coa alimentación, haberá postos de xeados, galletas, queixo ou marmeladas.
Ademais dos postos de exposición e venda, Artesanamente volve apostar por mostrar o labor dos artesáns e artesás en directo e a pé de rúa, na rúa do Vilar. No exterior da sede de AFundación haberá exhibicións de traballo con coiro a cargo de Santiago Besteiro; con papel, con Cristina Velasco; con forxa con Jorge Eiroa; e con encaixe, con Ana Rosa Liste. Tamén mostrarán as súas técnicas o zoqueiro Álvaro Pin e a xoieira Paula Dacosta Ameijeiras.
A programación de Artesanamente complétase con faladoiros, showcookings e mesas redondas. No día 18 está prevista unha charla con “El rincón de Yobeida” sobre a súa cociña de fusión entre Galicia e Venezuela, e o sábado 19 haberá unha ampla oferta de actividades paralelas: unha degustación de pratos elaborados con produto de proximidade por Alén Tarrío, do restaurante Pampín; unha charla sobre a indumentaria tradicional galega a cargo da Asociación do Traxe Galego, ou unha degustación da que foi elixida no certame Santiago (É) Tapas como a mellor tapa creativa, elaborada polo establecemento Artesana. Xa no domingo 20, terá lugar unha charla sobre os oficios tradicionais cos zoqueiros Elena Ferro e Álvaro Pin.
