Compostela, 25/07/2026 – Hoxe é o día no que Compostela recoñece o traballo de algúns dos seus veciños máis insignes. A cita no Teatro Principal, sete e media da tarde, coa entrega dos premios Alba de Compostela que chegan a súa cuarta edición.
Os Alba de Compostela foron seleccionados polo Consello Asesor de Condecoracións de Santiago por unanimidade. Os galardoados este ano son Camilo Nogueira, pola súa traxectoria “política e persoal”; Concha Rozas, “unha das voces máis recoñecidas” de Pontepedriña; Ricardo Gurriarán, historiador galego e “de gran importancia” para a recuperación da memoria histórica, e Susi Xesto, expoñente contemporáneo da ourivaría compostelá.
Esta distinción foi posta en marcha polo goberno local actual en 2023 e entrégase habitualmente o 25 de xullo, Día de Galicia e de Santiago Apóstolo. Como en edicións anteriores, as persoas galardoadas proceden de ámbitos diversos e contribúen, a través da súa traxectoria profesional e persoal, “a facer de Compostela un referente”, como destacara na presentación a alcaldesa da cidade Goretti Sanmartín.
Os Alba de Compostela 2026
Camilo Nogueira (1936) trátase dunha “das figuras máis recoñecibles no desenvolvemento do autogoberno galego, que acabaría devolvendo a Santiago o seu papel de capital”. En concreto, participou na comisión redactora do Estatuto do Dezaseis, “o anteproxecto do vixente Estatuto de Autonomía”.
Pola súa banda, Ricardo Gurriarán Rodríguez (1953) é unha “autoridade” no ámbito da investigación ao redor do pasado histórico da Universidade de Santiago de Compostela (USC). Ademais, foi profesor no IES Arcebispo Xelmírez desde o ano 1977 até a súa xubilación.
Concha Rozas (1936) é un dos rostros “máis coñecidos e estimados” do movemento veciñal do barrio da Pontepedriña, segundo definiuna a alcaldesa. Nada en Santiago, chegou a vivir ao barrio tras a expropiación da súa vivenda en San Caetano. É recoñecida polo seu impulso ao asociacionismo, no marco da loita contra a alta sinistralidade.
Por último, Susi Xesto (1980) é depositaria, innovadora, transmisora e expoñente contemporáneo do legado artístico da ourivaría compostelá. Filla do ourive Eloy Xesto, retomou as actividades familiares no seu taller de Algalia de Abaixo, onde desde fai máis de tres lustros dá continuidade ao legado artístico familiar.
