Compostela, 22/07/2026 – O Pobo Xitano e parte de Compostela, e da bisbarra, desde sempre e sempre foron parte da sociedade por máis que lle pese a algúns. A Tarara Festa Xitana Galega celebra precisamente esa unión no marco das festas do Apóstolo 2026.
A concelleira de Festas, Pilar Lueiro, anima a toda a veciñanza a gozar de A Tarara Festa Xitana Galega que por primeira vez celebra a integración de culturas, a igualdade e a alegría e reivindica a unión de Galicia co pobo xitano, con máis dun século de convivencia.
O martes 28 de xullo ás 21.00 horas terá lugar esta novidosa proposta musical denominada A Tarara. Un evento que xunta artistas de primeiro nivel coma Josemi Carmona ou Juan José Suárez ‘Paquete’, gañador de dous Grammy polo seu traballo con El Cigala y Tomatito; coa cantaora flamenca Rosario Heredia; Rafael Jiménez; Saray Muñoz; Alejandro Escalera; Rubén Fernández; Miguel De Flórez; ou o músico compostelán Moisés Fernández.
O Concello de Santiago patrocina este proxecto iniciativa da cooperativa MADA Producións coa dirección artística de Moisés Fernández e a coordinación de Rosa Bugallo, que tamén conta co apoio da Agadic.
A proposta busca dar a coñecer a cultura xitana a través da música, como cultura que forma parte da historia de Galicia, onde actualmente viven unhas 10.500 persoas de etnia xitana.
Ao mesmo tempo, A Tarara facilita o acceso á cultura por parte do pobo xitano, favorecendo tamén a súa integración a través de actividades culturais.‘A Tarara’ é unha canción de orixe sefardí que foi recuperada por Federico García Lorca e interpretada despois por Camarón. Esta Festa Xitana Galega “A TARARA” leva ese nome en homenaxe a todas as persoas e pobos historicamente discriminados.
