Un dos debates permanentes na sociedade trata dos distintos aspectos da hostalería, desde o horario ao soldo. Os principais sindicatos están na procura dun convenio que dignifique a profesión.
Que os principais sindicatos se poñan de acordo en mobilizacións e reivindicacións é un indicador claro da importancia do tema. CCOO, CIG e UGT anuncian as próximas protestas para esixir un convenio digno na hostalaría da provincia de A Coruña.
Un sector con beneficios á alza e plantillas precarizadas
Os datos publicados recentemente amosan que a hostalaría da provincia da Coruña vive un verán de récords de ocupación e actividade. No mes de xullo acadouse un 88 % de ocupación hoteleira, tres puntos máis que no ano anterior.
Os datos veñen abalados polas declaracións da patronal que recoñeceu que as cifras de 2025 igualan ou superan ás de 2023, a pesar dalgunhas inclemencias climatolóxicas. Este incremento de facturación e beneficios contrasta coa realidade das persoas traballadoras: salarios que apenas superan o SMI, xornadas abusivas, falta de descansos e ameazas de recortar dereitos como o complemento por Incapacidade Temporal.
Dende os sindicatos insisten en que non se pode pretender atraer nin reter persoal cualificado nun sector que cronifica a precariedade e converte a saúde laboral en moeda de cambio. As altas taxas de baixas por lesións musculoesqueléticas, estrés e fatiga crónica confirman que as condicións actuais son insostibles.
Mobilización social
Neste contexto, CCOO, CIG e UGT convocan á cidadanía e ao conxunto das traballadoras e traballadores a participar activamente nas recollidas de sinaturas e na concentración do 26 de setembro en Santiago de Compostela, baixo o lema “Por un convenio digno na hostalaría”.
As organizacións sindicais lembran que o éxito económico da hostalaría coruñesa non pode sosterse sobre a precariedade laboral. Se o sector medra en facturación e beneficios, é xusto e necesario que ese crecemento se traduza en melloras reais para as persoas que fan posible o seu funcionamento diario.
Outras accións
As seguintes accións están xa confirmadas e podedes anotalas se queredes apoiar aos traballadores do sector por riba dos empresarios do sector:
4 e 5 de setembro – Recollida de sinaturas no Obelisco da Coruña, de 10:00 a 13:00 horas.
11 de setembro – Recollida de sinaturas na Praza do Toural, Santiago de Compostela, de 10:00 a 13:00 horas.
12 de setembro – Recollida de sinaturas na Praza Roxa, Santiago de Compostela, de 10:00 a 13:00 horas.
26 de setembro – Concentración na Praza do Toural, Santiago de Compostela, de 11:00 a 12:00 horas, coa entrega de panfletos á cidadanía.
