Bisbarra, 27 de decembro do 2022 – A Asociación de empresarios Hostalaría.gal mostra a súa preocupación polo incremento de roubos en establecementos de Noia.
Denuncian que a vaga de roubos vense producindo desde hai meses. O último de estes sucesos na madrugada do domingo a onte luns. Piden un incremento de vixilancia e a presenza de máis efectivos dos corpos e forzas de seguridade en Noia.
O pasado xoves os empresarios mantiñan unha reunión co alcalde, Antonio Freire, que se comprometía a poñer a disposición dos hostaleiros todos os efectivos con que conta o concello.
Hostalaria.gal tamén solicitou unha reunión co delegado do goberno, José Miñones, para tratar esta situación de primeira man e buscar un aumento da vixilancia, xa que a Policía Local e a Garda Civil repártense ao 50% as funcións de control.
Os hostaleiros cren insostible esta situación porque case a diario se producen roubos cos conseguintes estragos, que aínda son máis prexudiciais polo cuantiosos que resultan os arranxos posteriores. Desde o sector consideran necesaria a implicación de todas as administracións con competencias en materia de seguridade para frear esta alarmante vaga de roubos e deter aos seus causantes.
